ലിജോ ജോസ് പെല്ലിശേരി സംവിധാനം ചെയ്യുന്ന ചിത്രത്തിൽ കുഞ്ചാക്കോ ബോബനും മഞ്ജു വാര്യരും പ്രധാന വേഷത്തിൽ എത്തുന്നു. ഇതാദ്യമായാണ് മഞ്ജു വാര്യരും കുഞ്ചാക്കോ ബോബനും ലിജോ ജോസ് പെല്ലിശേരി ചിത്രത്തിന്റെ ഭാഗമാവുന്നത്.

മഞ്ജു വാര്യർ രണ്ടാം വരവ് നടത്തിയ ഹൗ ഓൾഡ് ആർ യു എന്ന ചിത്രത്തിൽ കുഞ്ചാക്കോ ബോബൻ ആയിരുന്നു നായകൻ. 2016 ൽ രാജേഷ് പിള്ള സംവിധാനം ചെയ്ത വേട്ട എന്ന ചിത്രത്തിലാണ് ഇരുവരും അവസാനമായി ഒരുമിച്ചത്. ലിജോ - കുഞ്ചാക്കോ ബോബൻ - മഞ്ജുവാര്യർ ചിത്രത്തിന്റെ പ്രഖ്യാപനം വൈകാതെ ഉണ്ടാകുമെന്നാണ് വിവരം. മോഹൻലാൽ നായകനാവുന്ന മലൈക്കോട്ടൈ വാലിബനു ശേഷം ലിജോ ജോസ് പെല്ലിശേരി സംവിധാനം ചെയ്യുന്ന ചിത്രത്തിൽ വൻതാരനിരയുണ്ട്. മോഹൻലാലും ലിജോയും ആദ്യമായി ഒരുമിക്കുന്ന മലൈക്കോട്ടൈ വാലിബൻ ജനുവരി 25 ന് റിലീസ് ചെയ്യും. മോഹൻലാൽ ആരാധക‌ർ ആകാംക്ഷയോടെ കാത്തിരിക്കുന്ന മലൈക്കോട്ടൈ വാലിബൻ പുതുവർഷത്തിൽ മോഹൻലാലിന്റെ ആദ്യ റിലീസാണ്. ബോളിവുഡ് താരം സൊണാലി കുൽകർണിയുടെ മലയാളം അരങ്ങേറ്റ ചിത്രം കൂടിയാണ്.