ന്യൂഡൽഹി: ജമ്മു കാശ്മീർ അതിർത്തിയായ അർണിയയിലുണ്ടായ പാക് സൈന്യത്തിന്റെ വെടിവയ്പ്പിൽ രണ്ട് ജവാന്മാർക്കും ഒരു പൗരനും പരിക്കേറ്റു. ഇവരെ വിദഗ്ദ്ധ ചികിത്സയ്ക്കായി ജമ്മുവിലെ ജിഎംസി ആശുപത്രിയിലേയ്ക്ക് മാറ്റി. പരിക്കേറ്റവരുടെ ആരോഗ്യനില തൃപ്തികരമാണെന്നാണ് റിപ്പോർട്ട്.
ഇന്നലെ രാത്രി എട്ട് മണിയോടെയാണ് അർണിയ സെക്ടറിൽ പാകിസ്ഥാൻ സൈനികർ പ്രകോപനമില്ലാതെ വെടിവയ്പ്പ് ആരംഭിച്ചത്. പിന്നാലെ ഇന്ത്യൻ സൈന്യം തിരിച്ചടിച്ചു. മോർട്ടാർ ഷെല്ലുകൾ ഉപയോഗിച്ചായിരുന്നു ആക്രമണമെന്ന് ബിഎസ്എഫ് ഔദ്യോഗിക വാർത്താക്കുറിപ്പിലൂടെ അറിയിച്ചു. ഇരുവശത്തുനിന്നുമുള്ള ആക്രമണം പുലർച്ചെ മൂന്ന് മണിവരെ നീണ്ടുനിന്നു. യാതൊരു പ്രകോപനവുമില്ലാതെയാണ് പാകിസ്ഥാന്റെ ഭാഗത്ത് നിന്നും ആക്രമണം ഉണ്ടായതെന്നും ഇന്ത്യൻ സൈന്യം അറിയിച്ചു.
അപ്രതീക്ഷിതമായുണ്ടായ വെടിവയ്പ്പിൽ പ്രദേശവാസികളും ഞെട്ടലിലാണ്. 'രാത്രിയായപ്പോഴാണ് വെടിവയ്പ്പ് ആരംഭിച്ചത്. നാല് വർഷത്തിന് ശേഷമാണ് ഈ പ്രദേശത്ത് ഇങ്ങനൊരു സംഭവമുണ്ടാകുന്നത്. ഞങ്ങളുടെ കുട്ടികൾ ഭയത്തിലാണ്. എല്ലാ വീടുകളിലും ബങ്കറുകൾ ഇല്ലാത്തതും ആശങ്കാജനകമാണ്.' - പ്രദേശവാസി പറഞ്ഞു. സംഭവത്തിൽ അർണിയയ്ക്ക് സമീപമുള്ള സുച്ത്ഗഡ്, സിയ, ജബോവൽ, ട്രെവ തുടങ്ങിയ പ്രദേശങ്ങളും വെടിവയ്പ്പിൽ തീപിടുത്തം ഉണ്ടായതായി റിപ്പോർട്ടുണ്ട്.
അപ്ഡേറ്റായിരിക്കാം ദിവസവും
ഒരു ദിവസത്തെ പ്രധാന സംഭവങ്ങൾ നിങ്ങളുടെ ഇൻബോക്സിൽ |