ആരോഗ്യസംരക്ഷണത്തിനും ചർമ്മസംരക്ഷണത്തിനും എല്ലാവരും ഒരു പോലെ ഭക്ഷണത്തിൽ ഉൾപ്പെടുത്തുന്ന ഒന്നാണ് 'എ ബി സി' ജ്യൂസ്. ആപ്പിൾ, ബീ​റ്റ്റൂട്ട്, ക്യാര​റ്റ് തുടങ്ങിയവയാണ് എബിസി ജ്യൂസിലെ പ്രധാന ചേരുവകൾ. ഈ മൂന്ന് സാധനങ്ങളുടെ ഗുണം ജ്യൂസിൽ അടങ്ങിയിരിക്കുന്നുവെന്നതാണ് പ്രത്യേകത.

പലർക്കും എ ബി സി ജ്യൂസ് കുടിക്കാൻ അൽപം പ്രയാസമായിരിക്കാം. അതിനാൽ ജ്യൂസ് നന്നായി അരിച്ച് അതിൽ പഞ്ചസാരയോ അല്ലെങ്കിൽ തേനോ ചേർത്താണ് കുടിക്കാറുളളത്. ഇങ്ങനെ കുടിച്ചാൽ ഗുണകരമാകുമോയെന്നുളളത് ഒട്ടുമിക്കവരുടെയും സംശയമാണ്. നമ്മുടെ ശരീരത്തിന് ഏറെ ഗുണകരമാണ് ഇത്. ഉയർന്ന അളവിൽ വി​റ്റാമിനുകളും ആന്റിഓക്സിഡന്റുകളും ജ്യൂസിൽ അടങ്ങിയിട്ടുണ്ട്. വി​റ്റാമിൻ എ, ബി, ബി വൺ, ബി സിക്സ്,സി തുടങ്ങിയവയാണ് അടങ്ങിയിരിക്കുന്നത്. സിങ്ക്, മഗ്നീഷ്യം, കോപ്പർ, സെലേനിയം മുതലായവയും ജ്യൂസിലുണ്ട്.

ഒരേസമയം ഇത് എനർജി ഡ്രിങ്കായിട്ടും ജ്യൂസായും കുടിക്കാവുന്നതാണ്. ഇവയിൽ ധാരാളം ഫൈബർ അടങ്ങിയിട്ടുണ്ട്. അതിനാൽ ഒരു നേരത്തെ ഭക്ഷണമായി ഉപയോഗിക്കാം. ദിവസവും ഒരു നേരം ജ്യൂസ് കുടിക്കുന്നവരുടെ മുഖത്തിന് നല്ല തിളക്കവും ഉൻമേഷവും ലഭിക്കും.

എ ബി സി ജ്യൂസ് കുടിക്കുന്നത് കൊണ്ടുളള ഗുണങ്ങൾ

1. ദിവസേന എബിസി കുടിക്കുന്നത് മലബന്ധം,പൈൽസ് പോലുളള അവസ്ഥകൾ തടയാൻ സഹായിക്കും.

2. കുടലിൽ അടിഞ്ഞുക്കൂടിയ പലതരത്തിലുളള രാസവസ്തുക്കളെ അരിച്ചുകളയാൻ ഇതിലെ ഫൈബറുകൾ സഹായിക്കും.

3. ഇതിൽ കാൽസ്യം,പൊട്ടാസ്യം,മഗ്നീഷ്യം തുടങ്ങിയവ അടങ്ങിയതിനാൽ ഗർഭിണികൾക്കും പിസിഒഡി ഉളളവർക്കും ഉത്തമമായിരിക്കും.

4. രോഗപ്രതിരോധശേഷി വർദ്ധിപ്പിക്കും.

5. കാഴ്ചശക്തി വർദ്ധിപ്പിക്കാം.

രുചികരമായ എ ബി സി ജ്യൂസ് തയ്യാറാക്കുന്ന വിധം.

പലർക്കും ബീ​റ്റ്റൂട്ടിന്റെ രുചി ഇഷ്ടപ്പെടണമെന്നില്ല. ജ്യൂസ് തയ്യാറാക്കാനായി ചേർക്കുന്ന ആപ്പിളിന്റെയും ക്യാര​റ്റിന്റെയും പകുതി അളവിൽ ബീ​റ്റ്റൂട്ട് ചേർത്താൽ മതി. ഇങ്ങനെ ചെയ്യുമ്പോൾ പ്രശ്നം പരിഹരിക്കാം.കുറച്ച് വെളളം കൂടി ചേർക്കുക. തയ്യാറാക്കുന്ന ജ്യൂസ് അരിച്ചുകളയാതെ കുടിക്കാൻ ശ്രമിക്കുക. എന്നാൽ മാത്രമേ ജ്യൂസിൽ അടങ്ങിയിരിക്കുന്ന ഫൈബർ പൂർണമായും നമ്മുടെ ശരീരത്തിൽ എത്തുകയുളളൂ.