അടുത്തിടെ ഏറെ ചർച്ചയായ വിഷയമാണ് ചിത്രങ്ങൾക്ക് റിവ്യൂ നൽകുന്നത്. ഇത് സിനിമയെ ബാധിക്കുന്നതായി പല സംവിധായകരും നിർമാതാക്കളും പറഞ്ഞിരുന്നു. ദിലീപ് നായകനായ ബാന്ദ്ര എന്ന ചിത്രത്തിന് നെഗറ്റീവ് റിവ്യൂ പറഞ്ഞ ചില യുട്യൂബ‌ർമാർക്കെതിരെ നിർമാതാവ് പരാതി നൽകിയതും ഏറെ വിവാദമായി.

ഇപ്പോഴിതാ സിനിമ റിവ്യൂവിനെക്കുറിച്ച് മെഗാ സ്റ്റാർ മമ്മൂട്ടിയുടെ പ്രതികരണമാണ് ശ്രദ്ധേയമാകുന്നത്. സിനിമയെ റിവ്യൂ കൊണ്ടാന്നും നശിപ്പിക്കാൻ കഴിയില്ലെന്നാണ് അദ്ദേഹം പ്രതികരിച്ചത്. ഒരു സിനിമാ പ്രമോഷനുമായി ബന്ധപ്പെട്ട് നടന്ന വാർത്താസമ്മേളനത്തിലായിരുന്നു മമ്മൂട്ടിയുടെ പ്രതികരണം.

'സിനിമയെ റിവ്യൂ കൊണ്ടൊന്നും നശിപ്പിക്കാൻ കഴിയില്ല. ഓരോരുത്തരുടെയും കാഴ്ചപ്പാടാണ് റിവ്യൂവിലൂടെ പുറത്തുവരുന്നത്. റിവ്യൂ നിർത്തിയതുകൊണ്ടൊന്നും സിനിമ രക്ഷപ്പെടില്ല. റിവ്യൂക്കാർ ഒരു വഴിക്ക് പോകും. സിനിമ ഈ വഴിയ്ക്ക് പോകും. പ്രേക്ഷകർ തീരുമാനിക്കുന്നത് അവർക്ക് ഇഷ്ടമുള്ള സിനിമയാണ്. ഞാൻ മുൻപ് പറഞ്ഞിട്ടുണ്ട്. നമുക്ക് ഒരു അഭിപ്രായസ്വാതന്ത്ര്യമുണ്ട്. അത് നമ്മുടെ അഭിപ്രായങ്ങൾ തന്നെ ആയിരിക്കണം. വേറൊരാളുടെ അഭിപ്രായം നമ്മൾ പറഞ്ഞാൾ നമ്മുടെ അഭിപ്രായസ്വാതന്ത്ര്യം പോയി. അപ്പോൾ നമ്മുടെ അഭിപ്രായങ്ങൾക്ക് അനുസരിച്ച് തന്നെ വേണം സിനിമ കാണേണ്ടത്. നമുക്ക് തോന്നണം, സിനിമ കാണണോ വേണ്ടയോ എന്ന്'. എന്നാണ് മമ്മൂട്ടി പറഞ്ഞത്.