കൊട്ടിയൂർ: പാൽച്ചുരം ബോയ്സ് ടൗൺ റോഡിൽ കെ.എസ്.ആർ.ടി.സി ബസ് കുടുങ്ങി ഗതാഗതം തടസ്സപ്പെട്ടു.
ഇരിട്ടിയിൽ നിന്നും മാനന്തവാടിയിലേക്ക് പോവുകയായിരുന്ന ബസ്സാണ് ആശ്രമം ജംഗ്ഷന് മുകളിൽ വച്ച് യന്ത്രത്തകരാറിനെ തുടർന്ന് റോഡിൽ കുടുങ്ങിയത്.ഇതേത്തുടർന്ന് മണിക്കൂറുകളോളം ഗതാഗതം തടസ്സപ്പെട്ടു. ഇതോടെ നിരവധി യാത്രക്കാരാണ് പാതിവഴിയിൽ കുടുങ്ങിയത്.
നാട്ടുകാരും യാത്രക്കാരും ചേർന്ന് ചെറുവാഹനങ്ങൾക്ക് പോകാൻ വഴിയൊരുക്കി.മണിക്കൂറുകൾക്ക് ശേഷം മാനന്തവാടി കെ.എസ്.ആർ.ടി.സി ഡിപ്പോയിൽ നിന്നും മെക്കാനിക്ക് എത്തി യന്ത്രത്തകരാർ താത്കാലികമായി പരിഹരിച്ച് ബസ് റോഡ് അരികിലേക്ക് മാറ്റി ഗതാഗതം പുനഃസ്ഥാപിക്കുകയായിരുന്നു.
കണ്ണൂർ വയനാട് ജില്ലകളെ ബന്ധിപ്പിക്കുന്ന പാൽച്ചുരം റോഡിലൂടെ സർവീസ് നടത്തുന്ന കെ.എസ്.ആർ.ടി.സി ബസാണ് ദിവസേന ഇതുവഴി സഞ്ചരിക്കുന്ന നൂറുകണക്കിന് യാത്രക്കാരുടെ ആശ്രയം.
മലപ്പുറം, കോഴിക്കോട്,കണ്ണൂർ, കാസർകോട്, വയനാട് ജില്ലകളിലെ വിവിധ ഡിപ്പോകളിൽ നിന്നായി അമ്പതിലേറെ ബസ്സുകൾ സർവീസ് നടത്തുന്ന കൊട്ടിയൂർ പാൽച്ചുരം റോഡിൽ കൂടുതലായും പഴയ ബസ്സുകളാണ് സർവീസ് നടത്തുന്നതെന്ന് നാട്ടുകാർ പറയുന്നു.തകരാറിനെ തുടർന്ന് ബസുകൾ റോഡിൽ കുടുങ്ങി ഗതാഗത തടസ്സം പാൽച്ചുരത്ത് പതിവാണ്. യന്ത്രത്തകരാർ മൂലം സർവീസ് മുടങ്ങുന്ന ബസിലെ യാത്രക്കാരെ പിന്നാലെ വരുന്ന ബസുകളിൽ കുത്തിനിറക്കുകയാണ് പതിവ്. ഇതുകാരണം ചുരം റോഡിൽ ബസ്സുകൾ വലിമുട്ടുന്നതും യാത്രക്കാർ ഇറങ്ങിക്കയറുന്നതും പതിവുകാഴ്ചയാണ്.
കെ.എസ്.ആർ.ടി.സി.ബസുകൾ ലാഭകരമായി സർവീസ് നടത്തുന്ന അപൂർവം റൂട്ടുകളിലൊന്നായ കൊട്ടിയൂർ ബോയ്സ് ടൗൺ വയനാട് ചുരം പാതയിൽകാലപ്പഴക്കം ചെന്ന ബസുകൾ പിൻവലിച്ച് പുതിയ ബസുകൾ നിരത്തിലിറക്കണം- കേളകം കെ.എസ്.ആർ.ടി.സി സംരക്ഷണ സമിതി, പാസഞ്ചേഴ്സ് അസോസിയേഷൻ
അപ്ഡേറ്റായിരിക്കാം ദിവസവും
ഒരു ദിവസത്തെ പ്രധാന സംഭവങ്ങൾ നിങ്ങളുടെ ഇൻബോക്സിൽ |