തിരുവനന്തപുരം: ഉന്നതവിദ്യാഭ്യാസ നിക്ഷേപ നയം രൂപീകരിക്കാനും യൂറോപ്പ്, അമേരിക്ക, ഗൾഫ്, സിംഗപ്പൂർ എന്നിവിടങ്ങളിൽ കോൺക്ലേവുകൾ നടത്താനുമുള്ള ബഡ്ജറ്റ് പ്രഖ്യാപനം വന്നത് മന്ത്രി ആർ. ബിന്ദു അറിയാതെ. ഉന്നതവിദ്യാഭ്യാസ കൗൺസിൽ ഉപാദ്ധ്യക്ഷൻ രാജൻ ഗുരുക്കളാണ് നിർദ്ദേശം വച്ചത്. ആഗോള വിദ്യാഭ്യാസ സംഗമം മന്ത്രി അറിഞ്ഞിട്ടില്ലെന്ന് രാജൻഗുരുക്കൾ തുറന്നുപറഞ്ഞതോടെ വിവാദമായി.
കൗൺസിലിന്റെ ചുമതലയിൽ മേയ്, ജൂൺ മാസങ്ങളിൽ നാല് വിദേശ കോൺക്ലേവുകളും ആഗസ്റ്റിൽ സംസ്ഥാന കോൺക്ലേവും നടത്തുമെന്നാണ് ബഡ്ജറ്റ് പ്രഖ്യാപനം. കേരളത്തിൽ പുതിയ സ്ഥാപനങ്ങൾക്കുള്ള നിക്ഷേപം ആകർഷിക്കുകയാണ് ലക്ഷ്യം. ഇതിന് പ്രോത്സാഹന പാക്കേജുണ്ടാകും. നയപരമായ കാര്യമായിട്ടും മന്ത്രി അറിഞ്ഞില്ല. വിദേശ സർവകലാശാലകൾ അനുവദിക്കുമെന്ന പ്രഖ്യാപനവും മന്ത്രി അറിയാതെയാണ്. വിദേശ വാഴ്സിറ്റികളുടെ കാര്യത്തിൽ സംസ്ഥാനങ്ങൾക്ക് ഒഴിയാനാവില്ലെന്നാണ് രാജൻ ഗുരുക്കൾ പറയുന്നത്.
മന്ത്രിയും വകുപ്പുമറിയാതെ തീരുമാനങ്ങളെടുക്കുന്ന ഗുരുക്കളെ പുറത്താക്കണമെന്ന് മന്ത്രി ബിന്ദു നേരത്തേ ആവശ്യപ്പെട്ടിരുന്നതാണ്. കഴിഞ്ഞ സെപ്തംബറിൽ മുഖ്യമന്ത്രിയുടെ ഓഫീസിടപെട്ട് ഗുരുക്കളെ തുടരാൻ അനുവദിച്ചു. 2021ൽ നാലുവർഷ കാലാവധി കഴിഞ്ഞ ഗുരുക്കൾ കൗൺസിലിൽ തുടരുന്നതിനിടെയാണ് സെപ്തംബറിൽ 4 വർഷം കൂടി നീട്ടിയത്. ഫലത്തിൽ 7വർഷമായി കൗൺസിൽ തലപ്പത്തുണ്ട്.
അപ്ഡേറ്റായിരിക്കാം ദിവസവും
ഒരു ദിവസത്തെ പ്രധാന സംഭവങ്ങൾ നിങ്ങളുടെ ഇൻബോക്സിൽ |