കാരണം ഡീസൽ പമ്പിലേയ്ക്കുള്ള വയറുകൾ ഷോർട്ടായത്
കൊല്ലം: കായംകുളത്ത് ഓടിക്കൊണ്ടിരുന്ന കെ.എസ്.ആർ.ടി.സി വെസ്റ്റിബ്യൂൾ ബസ് തീപിടിച്ച് പൂർണമായി കത്തിനശിക്കാൻ ഇടയാക്കിയത് ബസിന്റെ കാലപ്പഴക്കവും അറ്റകുറ്റപ്പണികളിലെ പോരായ്മയെന്ന് സൂചന.
ഇന്നലെ രാവിലെയാണ് കായംകുളം എം.എസ്.എം കോളേജിന് സമീപം ബസ് തീപിടിച്ച് പൂർണമായും കത്തിനശിച്ചത്. ഡ്രൈവറുടെയും കണ്ടക്ടറുടെയും അവസരോചിതമായ ഇടപെടലാണ് ആളപായം ഒഴിവാക്കിയത്. സംസ്ഥാനത്തെ ഏക വെസ്റ്റിബ്യൂൾ (രണ്ട് ബസുകൾ യോജിപ്പിച്ചത്) ബസാണ് കത്തിനശിച്ചത്. 2022 മാർച്ച് 31നാണ് ഈ ബസ് കരുനാഗപ്പള്ളിയിലെത്തിച്ചത്. കരുനാഗപ്പള്ളി - തോപ്പുംപ്പടി റൂട്ടിലാണ് സർവീസ് നടത്തിയിരുന്നത്. കാലപ്പഴക്കം മൂലം ഡീസൽ പമ്പിൽ നിന്നുള്ള വയറുകൾ ഷോർട്ടായതാണ് തീപിടിക്കാൻ കാരണമെന്നാണ് പ്രാഥമിക നിഗമനം. സംഭവത്തിൽ അന്വേഷണം നടത്താൻ മന്ത്രി കെ.ബി.ഗണേശ് കുമാർ നിർദ്ദേശം നൽകി.
അറ്റകുറ്റപ്പണികൾ പേരിലൊതുങ്ങി
അറ്റകുറ്റപ്പണികളുടെ പേരിൽ വെസ്റ്റിബ്യൂൾ ബസിന്റെ ട്രിപ്പ് മുടക്കാനാകില്ല. പഴയ ബസായതിനാൽ പലപ്പോഴും അറ്റകുറ്റപ്പണികൾക്കുള്ള സാമഗ്രികൾ വർക്ക് ഷോപ്പിൽ ലഭ്യമാകില്ല. കമ്പനികളിൽ നിന്ന് സ്റ്റോക്ക് എത്തിച്ചാണ് അറ്റകുറ്റപ്പണികൾ നടത്തുക. ആറ് ദിവസത്തിൽ കൂടുതൽ ബസ് അറ്റകുറ്റപ്പണിക്കായി ട്രിപ്പ് മുടങ്ങിക്കിടന്നാൽ ഡിപ്പോ എൻജിനിയർക്കെതിരെ നടപടി വരും. ഈ സാഹചര്യം ഒഴിവാക്കാൻ പലപ്പോഴും പേരിന് മാത്രമാണ് അറ്റകുറ്റപ്പണി നടക്കുന്നത്.
കിഴക്കേകോട്ടയിൽ തുടങ്ങി കായംകുളത്ത് അവസാനിച്ചു
വെസ്റ്റിബ്യൂൾ ബസ് മൂന്നുവർഷം മുമ്പ് തിരുവനന്തപുരം കിഴക്കേകോട്ടയിലാണ് ആദ്യ സർവീസ് ആരംഭിച്ചത്
പിന്നീട് ആറ്റിങ്ങൽ, കിളിമാനൂർ, കൊല്ലം ഡിപ്പോകളിൽ സർവീസ് നടത്തിയ ശേഷം കരുനാഗപ്പള്ളിയിലെത്തി
മിക്ക ഡിപ്പോകളിലും അറ്റകുറ്റപ്പണി നടത്താൻ പാർട്സുകൾ ലഭ്യമായിരുന്നില്ല
സ്പെയർ പാർട്സുകൾ ലഭിക്കാത്തതിനാൽ സ്വന്തം ഡിപ്പോകളിൽ നിന്ന് വെസ്റ്റിബ്യൂൾ ബസ് ഒഴിവാക്കാൻ ഡിപ്പോ മാനേജർമാർ മത്സരിക്കുകയാണ്.
കെ.എസ്.ആർ.ടി.സി ജീവനക്കാർ
അപ്ഡേറ്റായിരിക്കാം ദിവസവും
ഒരു ദിവസത്തെ പ്രധാന സംഭവങ്ങൾ നിങ്ങളുടെ ഇൻബോക്സിൽ |