തിരുവനന്തപുരം: ഇത്തവണ കിഴക്ക് വെള്ളകീറുംമുമ്പ് സ്ഥാനാർത്ഥികൾ നാടുചുറ്റൽ തുടങ്ങേണ്ടിവരും. ഉച്ചയ്ക്കുമുമ്പേ നിറുത്തിവയ്ക്കേണ്ടിയും വരും. അമ്മാതിരി ചൂടാണിപ്പോൾ. ഇടവേള കൊടുത്തേ പറ്റൂ. ഇല്ലെങ്കിൽ കുഴഞ്ഞു വീണുപോകും. അത്യുഷ്ണ മുന്നറിയിപ്പില്ലാത്ത ഒരു ദിവസം പോലുമില്ല. സ്ഥാനാർത്ഥികളും അണികളും ഒരുപോലെ വെള്ളംകുടിക്കുമെന്നുറപ്പ്. ക്ഷീണം മാറ്റാൻ നാരങ്ങാവെള്ളയും കരിക്കിൻ വെള്ളവും ബെസ്റ്റാണ്. അണികളുടെ ഉള്ളിൽ പൊള്ളുന്ന ചൂടാണ്. വോട്ടെടുപ്പ് കഴിഞ്ഞാലും 39 ദിവസം ഉള്ളിൽ തീയുമായി നടക്കണം. അപ്പോഴെ ഫലമറിയാൻ കഴിയൂ.
തിരഞ്ഞെടുപ്പ് തീയതി ഇന്നലെ വ്യക്തമായതോടെ വ്യക്തമായ പ്ലാനോടെയായിരിക്കും സ്ഥാനാർത്ഥികൾ ഇന്നു മുതൽ കളത്തിലിറങ്ങുക. ഈസ്റ്ററും വിഷുവുമെല്ലാം വോട്ടെടുപ്പിനു മുമ്പാണ്. ആശംസകാർഡുകൾ വോട്ടർമാരെ തേടിയെത്തും. തിരഞ്ഞെടുപ്പ് രംഗത്ത് പ്രവർത്തിക്കുന്നവരുടെ അവധിാക്കല യാത്രകൾ എന്തായാലും ഏപ്രിലിൽ നടക്കില്ല.
ദാഹമില്ലെങ്കിലും
വെള്ളം കുടിക്കണം
ദാഹം തോന്നിയില്ലെങ്കിലും ധാരാളം ശുദ്ധജലം കുടിക്കണം
നേരിട്ടുള്ള വെയിലേൽക്കാതിരിക്കുക. കുടയോ തൊപ്പിയോ ഉപയോഗിക്കുക.
കട്ടി കുറഞ്ഞതും വെളുത്തതോ, ഇളംനിറത്തിലുള്ളതോ ആയ അയഞ്ഞ വസ്ത്രങ്ങൾ ധരിക്കുക.
രണ്ടുനേരം തണുത്തവെള്ളത്തിൽ കുളിക്കുക.
ക്ഷീണമോ സൂര്യാഘാതം ഏറ്റതായോ തോന്നിയാൽ തണലിൽ വിശ്രമിക്കണം.
മുഖം കഴുകുകയും ശരീരം തണുപ്പിക്കുകയും വേണം.
ഫലങ്ങളും സലാഡുകളും കഴിക്കുക.
ഉപ്പിട്ട കഞ്ഞിവെള്ളം, നാരങ്ങാവെള്ളം, കരിക്കിൻ വെള്ളം തുടങ്ങിയവ ധാരാളമായി കുടിച്ച് വിശ്രമിക്കുക.
ആരോഗ്യസ്ഥിതി മെച്ചപ്പെടുന്നില്ലെങ്കിലോ ബോധക്ഷയം ഉണ്ടാകുകയോ ചെയ്താൽ ചികിത്സ തേടുക
അപ്ഡേറ്റായിരിക്കാം ദിവസവും
ഒരു ദിവസത്തെ പ്രധാന സംഭവങ്ങൾ നിങ്ങളുടെ ഇൻബോക്സിൽ |