അങ്കണവാടി​യെ അവഗണി​ച്ച് റോഡ് നവീകരണം

കൊട്ടാരക്കര: റോഡ് കോൺക്രീറ്റ് ചെയ്തി​ട്ടും അങ്കണവാടി​ക്ക് മുൻഭാഗം അവഗണി​ച്ചതി​ൽ പ്രതി​ഷേധം. മൈലം ഗ്രാമപഞ്ചായത്തിലെ ഇഞ്ചക്കാട് എൽ.പി.എസ്- അങ്കണവാടി റോഡിലാണ് അസാധാരണ നിർമ്മാണ പ്രവർത്തനം.

എൽ.പി സ്കൂൾ ജംഗ്ഷനിൽ നിന്ന് അങ്കണവാടി, ഗുരുമന്ദിരം വഴി പെരുംകുളം മഹാവിഷ്ണു നാഗരാജ ക്ഷേത്രത്തിലെത്തുന്ന രണ്ടര കിലോമീറ്ററുള്ള റോഡ് നേരത്തെ നവീകരിച്ചിരുന്നു. ഈ റോഡിന്റെ ഭാഗമായ നൂറ് മീറ്റർ ദൂരത്തി​ൽ അന്ന് ഒന്നും ചെയ്തി​ല്ല. ഇവിടം കുണ്ടും കുഴിയുമായി തീർത്തും തകർന്നുകിടന്നതാണ്. ഇഞ്ചക്കാട്, ഇഞ്ചക്കാട് തെക്ക് വാർഡുകളിലാണ് ഈ ഭാഗം ഉൾപ്പെടുന്നത്. രണ്ട് വാർഡ് മെമ്പർമാരും ചേർന്ന് നാലര ലക്ഷം രൂപ വീതം ചെലവിട്ട് തകർച്ചയിലുള്ള ഭാഗവും കോൺക്രീറ്റ് ചെയ്യാൻ പദ്ധതിയുണ്ടാക്കി. എന്നാൽ കോൺക്രീറ്റ് ജോലികൾ പൂർത്തിയായപ്പോഴും അംഗൻവാടിക്ക് മുന്നിൽ രണ്ടിടത്തായി പത്ത് മീറ്റർ വീതം നീളത്തിൽ കോൺക്രീറ്റ് നടന്നിട്ടില്ല. ഇരുപത് മീറ്റർ ഭാഗം ഒഴിച്ചിട്ട് നിർമ്മാണം പൂർത്തിയാക്കിയതിനെതിരെ പ്രതിഷേധം ശക്തമായിട്ടുണ്ട്.