മരംമുറിക്കാനെത്തിയവരെ ആക്രമിച്ച് ഗോത്രവർഗ്ഗക്കാർ

പെറു: പെറുവിലെ ആമസോൺ വനമേഖലയിൽ അനധികൃതമായി മരംമുറിക്കാനെത്തിയവരെ അമ്പും വില്ലും ഉപയോഗിച്ച് ആക്രമിച്ച് തുരത്തി ഗോത്ര വിഭാഗം. പുറംലോകവുമായി ബന്ധമില്ലാതെ ജീവിക്കുന്ന മാഷ്കോ പിറോ എന്ന ഗോത്ര വിഭാഗമാണ് ആക്രമണം നടത്തിയത്.

ജൂലായ് 27നായിരുന്നു സംഭവമെന്ന് ഗോത്ര വർഗ്ഗങ്ങളുടെ ക്ഷേമത്തിനായി പ്രവർത്തിക്കുന്ന സംഘടനകൾ പറയുന്നു. മരംവെട്ടുകാരുടെ സംഘത്തിലെ ഒരാൾക്ക് പരിക്കേറ്റു.

പെറുവിയൻ ആമസോൺ മേഖലയിലെ നദീതീരത്ത് ഭക്ഷണത്തിനും മറ്റുമായി തെരച്ചിൽ നടക്കുന്ന നൂറോളം മാഷ്കോ പിറോ വർഗ്ഗക്കാരുടെ ഡ്രോൺ ചിത്രങ്ങൾ അടുത്തിടെ പുറത്തുവന്നിരുന്നു. പിന്നാലെയാണ് ആക്രമണ വിവരം പുറത്തായത്.

മരംമുറിക്കൽ മാഫിയകൾ ഇവരുടെ പ്രദേശത്തോട് അപകടകരമാംവിധം അടുത്തെന്നതിന്റെ സൂചനയാണ് ചിത്രങ്ങളെന്ന് വിദഗ്ദ്ധർ പറയുന്നു. തങ്ങളുടെ അധീനതയിലുള്ള പ്രദേശത്തേക്ക് പുറത്തുനിന്നുള്ളവർ പ്രവേശിക്കാൻ ഇവർ അനുവധിക്കില്ല. തങ്ങളുമായി ആശയവിനിമയം നടത്താൻ ശ്രമിക്കുന്നവരെ ഇവർ ആക്രമിക്കും.

പെറുവിയൻ സർക്കാർ പുറംലോകവുമായി ബന്ധമില്ലാതെ കഴിയുന്ന ഇത്തരം ഗോത്രവർഗ്ഗങ്ങളുടെ സംരക്ഷണത്തിന് ശക്തമായ നടപടികൾ സ്വീകരിക്കണമെന്നാണ് ആവശ്യം. ഇവരുടെ മേഖലകളിലേക്ക് പുറത്തുനിന്നുള്ള മനുഷ്യർ കടന്നുകയറുന്നത് അവരിൽ പകർച്ചവ്യാധികൾ പിടിപെടാനും അക്രമങ്ങൾ പൊട്ടിപ്പുറപ്പെടാനും കാരണമാകും.

2022ൽ മാഷ്കോ പിറോ വർഗ്ഗക്കാരുടെ മേഖലയിൽ മീൻപിടിത്തത്തിന് ശ്രമിച്ച രണ്ട് പേർക്കും അമ്പേറ്റ് പരിക്കേറ്റിരുന്നു. സമാന സംഭവങ്ങൾ ഇതിന് മുമ്പും ആവർത്തിച്ചിട്ടുണ്ട്.