ഉജ്ജീവനം പദ്ധതി: പെരിന്തൽമണ്ണ നഗരസഭ 50,​000 രൂപ വീതം കൈമാറി

പെരിന്തൽമണ്ണ: അതിദരിദ്ര വിഭാഗത്തിൽപ്പെട്ടവർക്ക് സുസ്ഥിര ഉപജീവനമാർഗം ഉറപ്പു വരുത്തുന്ന 'ഉജ്ജീവനം' പദ്ധതിയുടെ ഭാഗമായി പെരിന്തൽമണ്ണ നഗരസഭയിലെ ഗുണഭോക്താക്കൾക്ക് 50,​000 രൂപ വീതം കൈമാറി. അഞ്ചാം വാർഡിലെ പാത്തുമ്മകുട്ടി, സുഹറ എന്നിവർക്കാണ് സംരംഭം ആരംഭിക്കാൻ ചെക്കുകൾ നഗരസഭാ ചെയർമാൻ പി.ഷാജി കൈമാറിയത്. മെമ്പർ സെക്രട്ടറി ടി.രാജീവൻ, കുടുംബശ്രീ ജില്ലാ മിഷൻ സോഷ്യൽ ഡെവലപ്‌മെന്റ് റിസോഴ്സ് പേഴ്സൺ സി.സൽമത്ത്, സി.ഡി.എസ് ചെയർപേഴ്സൺ വി.കെ.വിജയ, സി.ഡി.എസ് വൈസ് ചെയർപേഴ്സൺ പി.കെ.സീനത്ത്,​ , എ.ഡി.എസ് ചെയർപേഴ്സൺ ഉഷ എന്നിവർ പങ്കെടുത്തു.