ദുബായ് പൊലീസിന്റെ ഭാഗമാകണോ? ഇപ്പോൾ അപേക്ഷിക്കാം, ആവശ്യമായ രേഖകൾ ഇവ

പ്രവാസികൾ ഉൾപ്പെടെയുള്ളവർക്ക് വലിയൊരു തൊഴിലവസരം ഒരുങ്ങുകയാണ് യുഎഇയിൽ. ദുബായ് പൊലീസിന്റെ ഭാഗമാവാൻ ഇപ്പോൾ അപേക്ഷിക്കാം. ദുബായ് പൊലീസിന്റെ ഗതാഗത സുരക്ഷാ അഡ്‌മിനിസ്‌ട്രേഷൻ വിഭാഗത്തിലാണ് തൊഴിലവസരമൊരുങ്ങുന്നത്. സർവകലാശാല ഡിഗ്രിയോ ഹൈസ്‌കൂൾ ഡിഗ്രിയോ ഉള്ള പുരുഷ യുഎഇ പൗരന്മാർക്ക് അപേക്ഷിക്കാം. സെപ്തംബർ രണ്ട് മുതൽ 27വരെ അപേക്ഷ നൽകാം. jobs@tsd.ae എന്ന ഇ-മെയിൽ ഐഡിയിലൂടെയാണ് അപേക്ഷ സമർപ്പിക്കേണ്ടത്.

• രാജ്യത്തെ അംഗീകൃത സർവകലാശാലയിൽ നിന്നോ ഹൈസ്‌‌കൂളിൽ നിന്നോ ലഭിച്ച സർട്ടിഫിക്കേറ്റ് കൈവശമുള്ള പൗരന്മാർക്കാണ് അപേക്ഷിക്കാനവസരം.
• കുറ്റകൃത്യത്തിന് ശിക്ഷിക്കപ്പെട്ടിട്ടുള്ളവർക്ക് അപേക്ഷിക്കാനാവില്ല.
• 18 മുതൽ 30 വയസുവരെയാണ് പ്രായപരിധി
• ഉയരം 165 സെന്റിമീറ്ററിൽ കുറയാൻ പാടില്ല.
• പരീക്ഷ, മെഡിക്കൽ പരിശോധന, അഭിമുഖം തുടങ്ങിയവ പാസാകണം

ആവശ്യമായ രേഖകൾ

• ഗതാഗത സുരക്ഷാ അഡ്മിനിസ്ട്രേഷനെ അഭിസംബോധന ചെയ്തുകൊണ്ടുള്ള പെരുമാറ്റ സർട്ടിഫിക്കറ്റ്
• പാസ്‌പോർട്ട്
• അംഗീകൃത പഠനകേന്ദ്രത്തിൽ നിന്നുള്ള അക്കാഡമിക് സർട്ടിഫിക്കറ്റ്
• ജനന സർട്ടിഫിക്കറ്റ്
• ഐഡി കാർഡ്
• കളർ ഫോട്ടോ
• മാതാപിതാക്കളുടെ പാസ്‌പോർട്ടിന്റെയും ഐഡി കാർഡിന്റെയും പകർപ്പ്
• പ്രവൃത്തി പരിചയ സർട്ടിഫിക്കറ്റിന്റെ പകർപ്പ്
• നാഷണൽ സർവീസ് ആൻഡ് റിസർവ് അതോറിറ്റിയിൽ നിന്നുള്ള ക്ലിയറൻസ് സർട്ടിഫിക്കറ്റിന്റെ പകർപ്പ്