യുവാവിനെ കുത്തിപ്പരിക്കേൽപ്പിച്ച പ്രതി പിടിയിൽ

കണ്ണൂർ: പയ്യാമ്പലം സവോയ് ബിയർ പാർലറിന് സമീപമുള്ള കാർ പാർക്കിംഗ് സ്ഥലത്തിന് സമീപം യുവാവിനെ കത്തികൊണ്ടു കുത്തി പരിക്കേൽപ്പിക്കുകയും തടയാൻ ചെന്ന സുഹൃത്തുക്കളെ ആക്രമിച്ചു പരിക്കേൽപ്പിക്കുകയും ചെയ്ത സംഭവത്തിൽ യുവാവ് അറസ്റ്റിൽ. തയ്യിൽ സ്വദേശി നിഥീഷിനെയാണ് ടൗൺ പൊലീസ് അറസ്റ്റ് ചെയ്തത്. തിരുവോണ നാളിൽ രാത്രി ഒൻപതു മണിയോടെയാണ് സംഭവം. പള്ളിക്കുന്നിലെ അനുഗ്രഹം ഹൗസിൽ അജയ് ഉമേഷ് കുമാറി (24)നാണ് കുത്തേറ്റത്. കൂടെയുണ്ടായിരുന്ന സുഹൃത്തുക്കളായ സെയ്ൻ (20), ജിതിൻ (20), എന്നിവർക്കും പരിക്കേറ്റിരുന്നു. ഗുരുതരമായി പരിക്കേറ്റ ഉമേഷ് കുമാർ കണ്ണൂർ ശ്രീചന്ദ് ആശുപത്രിയിൽ ചികിത്സയിലാണ്‌.