യുവാവിനെ  വീടുകയറി വെട്ടിയ പ്രതി പിടിയിൽ; പിടികൂടിയത് കോയമ്പത്തൂരിൽ നിന്ന്

ആലപ്പുഴ: യുവാവിനെ വീടുകയറി വെട്ടിപ്പരിക്കേൽപ്പിച്ച പ്രതി പിടിയിൽ. കലവൂർ സ്വദേശി സുബിനാണ് കോയമ്പത്തൂരിൽ നിന്ന് പിടിയിലായത്. പ്രതി ബലമായി പിടിച്ചുകൊണ്ട് പോയ ഭാര്യയെയും കണ്ടെത്തി. വേട്ടേറ്റ് ബെെജു ആശുപത്രിയിൽ ചികിത്സയിലാണ്. കഴിഞ്ഞ ദിവസമാണ് ആലപ്പുഴയിലെ രാമങ്കരിയിൽ സംഭവം നടക്കുന്നത്.

സംഭവിച്ചത് ഇങ്ങനെ

വേഴപ്ര സ്വദേശി ബൈജുവിനാണ് വെട്ടേറ്റത്. ബൈജുവിനൊപ്പം ഉണ്ടായിരുന്ന യുവതിയുടെ ഭർത്താവായ സുബിനാണ് വെട്ടിയത്. യുവതി സുബിന്റെ മുൻ ഭാര്യയാണ്. കുറച്ചുനാളായി സുബിനും ഭാര്യയും പിണക്കത്തിലായിരുന്നു. ഓണത്തിന് മുമ്പാണ് യുവതി ബൈജുവിനൊപ്പം താമസിക്കാൻ തുടങ്ങിയത്. നാലുവശവും വെള്ളത്താൽ ചുറ്റപ്പെട്ട ഒരു തുരുത്തിലായിരുന്നു ബൈജുവിന്റെ വീട്. പുലർച്ചെ രണ്ടുമണിയോടെ നീന്തിയാണ് സുബിൻ ബൈജുവിന്റെ വീട്ടിൽ എത്തിയത്. തുടർന്ന് അവിടത്തന്നെ ഉണ്ടായിരുന്ന വാക്കത്തിയെടുത്താണ് ആക്രമിച്ചത്.

ബൈജുവിന്റെ കഴുത്തിനും വയറിനുമാണ് പരിക്കേറ്റത്. മാരകമായി വെട്ടേറ്റ ബൈജു ബോധരഹിതനായി വീണതോടെ സുബിൻ യുവതിയുമായി നീന്തി സ്ഥലംവിട്ടു. ഏറെ നേരം കഴിഞ്ഞ് ബാേധം വീണപ്പോഴാണ് താൻ ആക്രമിക്കപ്പെട്ട വിവരം ബൈജു കൂട്ടുകാരെ വിളിച്ചറിയിച്ചത്. അവരെത്തുമ്പോഴേക്കും രക്തത്തിൽ കുളിച്ച് ഏറെ അവശനായിരുന്നു ബൈജു.