'അതെല്ലാം പതിവ് ആരോപണം മാത്രം, വർഗീയ ശക്തികളുടെ വോട്ടുകൾ വേണ്ടെന്ന് തന്നെയാണ് നിലപാട്';ഷാഫി പറമ്പിൽ

ന്യൂഡൽഹി: വർഗീയ ശക്തികളുടെ വോട്ട് വേണ്ടെന്ന് തന്നെയാണ് എല്ലാ കാലത്തെയും നിലപാടെന്ന് ഷാഫി പറമ്പിൽ എംപി. എസ്‌ഡിപിഐ - ജമാഅത്തെ ഇസ്ലാമി വോട്ടുകൾ കിട്ടിയെന്നത് പതിവ് ആരോപണം മാത്രമാണെന്നും ഷാഫി പറമ്പിൽ ഒരു മാദ്ധ്യമത്തോട് പറഞ്ഞു. തന്റെ തുടർച്ചക്കാരനെന്ന മേൽവിലാസത്തിലാകില്ല രാഹുൽ മാങ്കൂട്ടത്തിൽ പാലക്കാട് പ്രവർത്തിക്കുക. വികസനത്തിൽ പുതിയ മാതൃക രാഹുൽ മുമ്പോട്ട് വയ്‌ക്കുമെന്നും ഷാഫി പറമ്പിൽ ഡൽഹിയിൽ പറഞ്ഞു.

'പാലക്കാട്ടെ വിജയത്തിന്റെ ക്രെഡിറ്റ് ഒരു വർഗീയ കക്ഷിക്കും അവകാശപ്പെടാനില്ല. വർഗീയ വോട്ടുകൾ വേണ്ടെന്ന നിലപാടിൽ തന്നെയാണ് തിരഞ്ഞെടുപ്പിനെ നേരിട്ടത്. ഇ പി ജയരാജന്റെ ആത്മകഥ പോലും എന്റെ തിരക്കഥ ആണെന്ന് പ്രചരിപ്പിച്ചവരാണ് എനിക്കെതിരെ പെട്ടിക്കഥ പ്രചരിപ്പിച്ചത്. പദവി നോക്കിയല്ല സന്ദീപ് വാര്യർ കോൺഗ്രസിൽ വന്നത്. അത്തരത്തിൽ ഒരു ചർച്ചയും പാർട്ടിയിൽ നടന്നിട്ടില്ല' - ഷാഫി പറമ്പിൽ പറഞ്ഞു.