പിന്നെയും ആശ്വാസം, ഒറ്റദിവസം കൊണ്ട് സ്വർണവില കുറഞ്ഞു; അറിയാം ഇന്നത്തെ നിരക്ക്

തിരുവനന്തപുരം: സംസ്ഥാനത്ത് ഇന്ന് സ്വർണവില കുറഞ്ഞു. ഒരു പവൻ സ്വർണത്തിന് 200 രൂപയാണ് കുറഞ്ഞത്. ഇന്ന് ഒരു പവൻ സ്വർണത്തിന്റെ വില 56,920 രൂപയാണ്. ഒരു ഗ്രാം 22 കാര​റ്റ് സ്വർണത്തിന്റെ വില 7,115 രൂപയും ഒരു ഗ്രാം 24 കാര​റ്റ് സ്വർണത്തിന്റെ വില 7,762 രൂപയുമായി. കഴിഞ്ഞ ദിവസം സ്വർണവിലയിൽ 80 രൂപ വർദ്ധിച്ച് ഒരു പവൻ സ്വർണത്തിന് 57,120 രൂപയായിരുന്നു.

കഴിഞ്ഞ മാസം പകുതിയോടെയാണ് സ്വർണവിലയിൽ ഞെട്ടിപ്പിക്കുന്ന കുറവ് സംഭവിച്ചത്. അത്തരത്തിലുളള മാ​റ്റം ഡിസംബറിലെ ആഗോള വിപണിയിൽ ഇതുവരെ സംഭവിച്ചിട്ടില്ല. ഈ മാസം ഏ​റ്റവും ഉയർന്ന സ്വർണനിരക്ക് രേഖപ്പെടുത്തിയത് ഡിസംബർ ഒന്നിനായിരുന്നു. അന്ന് ഒരു പവൻ സ്വർണത്തിന്റെ വില 57,200 രൂപയായിരുന്നു. രാജ്യാന്തര സ്വർണ വ്യാപാരത്തിൽ ഇന്ന് നേരിയ നഷ്ടം സംഭവിച്ചിട്ടുണ്ട്. ഔൺസിന് 10.09 ഡോളർ താഴ്ന്ന് 2,642.30 ഡോളറിലേക്ക് എത്തി. മുൻപ് 2,700 ഡോളറിൽ എത്തിയിരുന്ന വിലയാണ് ഇപ്പോൾ കുറഞ്ഞിരിക്കുന്നത്. ഇതാണ് കേരളത്തിലും സ്വർണവില ഇടിയാൻ കാരണമായത്. കൂടാതെ ആഗോള തലത്തിൽ നടക്കുന്ന യുദ്ധങ്ങളും സംഘർഷങ്ങളും സ്വർണവില ഇടിയാൻ കാരണമാകാറുണ്ട്.

ഇന്നത്തെ വെളളിവില

സംസ്ഥാനത്തെ വെളളിവിലയിൽ ഇന്ന് മാ​റ്റങ്ങളൊന്നും സംഭവിച്ചിട്ടില്ല. ഒരു ഗ്രാം വെളളിയുടെ വില 101 രൂപയും ഒരു കിലോഗ്രാം വെളളിയുടെ വില 101,000 രൂപയുമാണ്. ഡോളറുമായി താരതമ്യം ചെയ്യുമ്പോൾ രൂപയുടെ മൂല്യത്തിൽ വരുന്ന കയ​റ്റിറക്കങ്ങളും വെളളിവിലയെ സ്വാധീനിക്കും.