കാവ്യ മാധവന്റെ അരഞ്ഞാണം ദിലീപ് മോഷ്ടിക്കുന്ന സീൻ കോപ്പിയടിച്ചതോ? സത്യം തുറന്നുപറഞ്ഞ് ലാൽജോസ്

ദിലീപിനെയും കാവ്യ മാധവനെയും ഹിറ്റ് ജോഡികളാക്കിയ ഒരു ചിത്രമാണ് ലാൽ ജോസ് സംവിധാനം ചെയ്ത മീശമാധവൻ. 2002ൽ പുറത്തിറങ്ങിയ ചിത്രം അന്ന് കുടുംബ പ്രേക്ഷകർ ഏറ്റെടുത്തതോടെ ബോക്‌സോഫീസിൽ വൻ ഹിറ്റായിരുന്നു. ഒരു ഗ്രാമത്തിലെ ചെറിയ കള്ളന്റെ ജീവിതവും പ്രണയവും മറ്റുമാണ് ചിത്രത്തിന്റെ ഇതിവൃത്തം. ഇന്നും മീശമാധവനിലെ ഓരോ സീനും മലയാളികളുടെ മനസിലുണ്ട്.

ഇപ്പോഴിതാ മീശമാധവൻ പുറത്തിറക്കി 22 വർഷം പിന്നിടുമ്പോൾ ഒരു സീനിന് പിന്നിലെ കഥ പറയുകയാണ് ലാൽ ജോസ്. മീശമാധവനിൽ ദിലീപ് കാവ്യമാധവന്റെ വീട്ടിൽ എത്തി അരഞ്ഞാണം മോഷ്ടിക്കുന്ന ഒരു സീനുണ്ട്. ഈ സീൻ എങ്ങനെ സിനിമയിലേക്ക് വന്നു എന്നതിനെക്കുറിച്ചാണ് ലാൽ ജോസ് തുറന്നുപറയുന്നത്. തന്റെ യൂട്യൂബ് ചാനലിൽ പങ്കുവച്ച വീഡിയോയിലാണ് ഇക്കാര്യത്തെക്കുറിച്ച് തുറന്നുപറയുന്നത്.

ലാൽജോസിന്റെ വാക്കുകളിലേക്ക്..
'ഒരു സംഗീത ആൽബം ചെയ്യുന്ന സമയത്താണ് ഞാനും ബിആർ പ്രസാദും തമ്മിൽ അടുക്കുന്നത്. ആ സമയത്ത് അദ്ദേഹം ചന്ദ്രോത്സവത്തിന്റെ തിരക്കഥ ഒരുക്കുകയാണ്. അത് സിനിമയാക്കാനൊക്കെ ശ്രമിച്ചെങ്കിലും എന്തോ കാരണത്താൽ നടന്നില്ല. ആ സിനിമയിൽ ഒരു കള്ളൻ മോഷ്ടിക്കാൻ ഒരു കൊട്ടാരത്തിൽ കയറുന്ന സീനുണ്ട്. അതിൽ ഉറങ്ങിക്കിടക്കുന്ന രാജകുമാരീടെ അരഞ്ഞാണം മോഷ്ടിക്കുന്ന രംഗം ഉണ്ടായിരുന്നു. എനിക്ക് അത് ഭയങ്കര രസായിട്ട് തോന്നി.

അന്ന് ഞാൻ പറഞ്ഞു, നിങ്ങൾ എന്തായാലും ഈ സിനിമ ചെയ്യുന്നില്ല, ഞാൻ ഒരു കള്ളന്റെ കഥ സിനിമയാക്കാൻ പോകുകയാണ്. ഇതിന്റെ ഒരു നാടൻ വേർഷനായിട്ട് ഞാൻ മീശ മാധവനിൽ ഉപയോഗിച്ചോട്ടെ എന്ന് ചോദിച്ചു. അന്ന് പുള്ളി സമ്മതിച്ചു. എന്നോട് ധൈര്യായിട്ട് എടുത്തോ അതിപ്പോൾ സിനിമ ആകാനൊന്നും പോകുന്നില്ല. അതിൽ അന്ന് പുള്ളി പറഞ്ഞ സീൻ എനിക്ക് ഇപ്പോഴും ഓർമ്മയുണ്ട്'- ലാൽജോസ് പറഞ്ഞു.