അഹമ്മദ് ഇമ്രാന് സെഞ്ച്വറി, കേരളം മികച്ച നിലയിൽ

മംഗലാപുരം: കൂച്ച് ബെഹാർ ട്രോഫിയിൽ ജാർഖണ്ഡിനെതിരെ കേരളത്തിന് 153 റൺസിന്റെ ഒന്നാം ഇന്നിംഗ്‌സ് ലീഡ്. ക്യാപ്ടൻ അഹ്മദ് ഇമ്രാന്റെ ഉജ്ജ്വല സെഞ്ച്വറിയാണ് കേരളത്തിന് മികച്ച ലീഡ് സമ്മാനിച്ചത്. കേരളത്തിന്റെ ആദ്യ ഇന്നിങ്സ് 322 റൺസിന് അവസാനിച്ചു. രണ്ടാം ഇന്നിങ്സിൽ ബാ​റ്റിങ്ങിന് ഇറങ്ങിയ ജാർഖണ്ഡ് വിക്ക​റ്റ് പോകാതെ 30 റൺസെന്ന നിലയിലാണ്.നാല് വിക്ക​റ്റിന് 76 റൺസെന്ന നിലയിലാണ് കേരളം രണ്ടാം ദിവസം ബാ​റ്റിങ് തുടങ്ങിയത്. കേരളത്തെ ശക്തമായ നിലയിലെത്തിച്ചത് ഇമ്രാനും അദ്വൈത് പ്രിൻസും ചേർന്നുള്ള അഞ്ചാം വിക്കറ്റ് കൂട്ടുകെട്ടാണ്. അഞ്ചാം വിക്കറ്റിൽ ഇരുവരും 182 റൺസ് കൂട്ടച്ചേർത്തു. ഏകദിന ശൈലിയിൽ ബാ​റ്റ് വീശിയ അഹ്മദ് ഇമ്റാൻ 160 പന്തുകളിൽ നിന്ന് 147 റൺസ് നേടി. 19 ഫോറും മൂന്ന് സിക്സും അടങ്ങുന്നതായിരുന്നു ഇന്നിംഗ്‌സ്. അദ്വൈത് പ്രിൻസ് 61 റൺസെടുത്തു.