കാളിദാസ് ജയറാമിന്റെ വിവാഹത്തിന് ഗുരുവായൂരിലെത്തിയ സുരേഷ് ഗോപിക്ക് ഓരോ ചുവട് വയ‌്ക്കുമ്പോഴും നിൽക്കേണ്ടി വന്നു

ജയറാമിന്റെയും പാർവതിയുടേയും മകനും നടനുമായ കാളിദാസ് ജയറാമിന്റെ വിവാഹത്തിന് ഗുരുവായൂരിലെത്തിയ കേന്ദ്രമന്ത്രി സുരേഷ് ഗോപിക്ക് ഒരോ ചുവട് വയ‌്ക്കുമ്പോഴും നിൽക്കേണ്ടി വന്നു. ഗുരുവായൂർ ക്ഷേത്രനടയിൽ വിവാഹത്തിനെത്തിയ മറ്റ് വധൂവരന്മാരുടെയും അവരുടെ ബന്ധുക്കളുടെയും തിരക്ക് കാരണമായിരുന്നു അത്. വധൂ വരന്മാരെല്ലാം സുരേഷ് ഗോപിയുടെ കാലിൽ തൊട്ട് അനുഗ്രം തേടി. എല്ലാവരെയും അനുഗ്രഹിച്ച് ചേർത്തു നിർത്തി ഫോട്ടോയും എടുപ്പിച്ചാണ് സുരേഷ് കാളിദാസിന്റെ വിവാഹത്തിൽ പങ്കെടുക്കാൻ പോയത്.

മോഡലായ താരിണി കലിംഗരായരെയാണ് കാളിദാസ് താലിചാർത്തിയത്. ഇരുവരും ദീർഘകാലമായി പ്രണയത്തിലായിരുന്നു. രാവിലെ ഏഴേ കാലിനും എട്ടിനുമിടയിലെ മുഹൂർത്തത്തിലായിരുന്നു താലികെട്ട്. കേന്ദ്രസഹമന്ത്രി സുരേഷ് ഗോപി, മകൻ ഗോകുൽ സുരേഷ്, മന്ത്രി മുഹമ്മദ് റിയാസ്, സംവിധായകൻ മേജർ രവി തുടങ്ങിയവർ വിവാഹത്തിൽ പങ്കെടുത്തു. ചുവപ്പിൽ ഗോൾഡൻ ബോർഡർ വരുന്ന മുണ്ടും മേൽമുണ്ടുമായിരുന്നു കാളിദാസിന്റെ വേഷം. പഞ്ചകച്ചം സ്റ്റൈലിലാണ് മുണ്ടുടുത്തത്.

പീച്ച് നിറത്തിലുള്ള സാരിയായിരുന്നു താരിണിയുടെ വേഷം. സാരിയിൽ നിറയെ ഗോൾഡൻ വർക്കുകൾ ചെയ്തിരുന്നു. മുല്ലപ്പൂ ചൂടി കൂടുതൽ സുന്ദരിയായിരുന്നു വധു. കഴിഞ്ഞ വെള്ളിയാഴ്ച്ച ഇരുവരും ചെന്നൈയിൽ പ്രീ വെഡ്ഡിംഗ് ആഘോഷങ്ങൾ നടത്തിയിരുന്നു. അടുത്ത സുഹൃത്തുക്കളും കുടുംബാംഗങ്ങളുമാണ് ഇതിൽ പങ്കെടുത്തത്. 2023 നവംബറിൽ ചെന്നൈയിലായിരുന്നു കാളിദാസിന്റെയും താരിണിയുടെയും വിവാഹനിശ്ചയം.

2022ൽ കാളിദാസിന്റെ വീട്ടിലെ ഓണാഘോഷത്തിന് താരിണിയും പങ്കെടുത്തതോടെയാണ് ഇരുവരും തമ്മിലുള്ള പ്രണയം പരസ്യമാകുന്നത്. നീലഗിരി സ്വദേശിയായ താരിണി 2019ൽ മിസ് തമിഴ്‌നാട്, മിസ് സൗത്ത് ഇന്ത്യ ഫസ്റ്റ് റണ്ണർ അപ്പ് കിരീടം ചൂടിയിരുന്നു. 2021ലെ മിസ് യൂണിവേഴ്‌സ് ഇന്ത്യ തേഡ് റണ്ണർ അപ്പ് ആയി. 2022ലെ മിസ് ദിവാ യൂണിവേഴ്‌സ് സൗന്ദര്യമത്സരത്തിലും പങ്കെടുത്തു. വിഷ്വൽ കമ്യൂണിക്കേഷനിൽ ബിരുദമുണ്ട്.

കാളിദാസിന്റെ സഹോദരി മാളവികയുടെ വിവാഹം ഗുരുവായൂരിൽ കഴിഞ്ഞ മേയിലാണ് നടന്നത്. 1992 സെപ്‌തംബർ ഏഴിന് ജയറാമിന്റേയും പാർവതിയുടേയും വിവാഹം ഗുരുവായൂരിലായിരുന്നു നടന്നത്. ചെന്നൈയിലെ പ്രമുഖ കലിംഗരായർ കുടുംബത്തിലെ അംഗമാണ് താരിണി.