'ലക്കി ഭാസ്കർ ആകണം'; സിനിമ കണ്ട് പണം സമ്പാദിക്കാൻ ഹോസ്റ്റലിൽ നിന്ന് ഒളിച്ചോടി ഒമ്പതാം ക്ലാസ് വിദ്യാർത്ഥികൾ

വിശാഖപട്ടണം: ദുൽഖർ സൽമാൻ നായകനായ 'ലക്കി ഭാസ്കർ' ചിത്രം കണ്ട് പണം സമ്പാദിക്കാൻ ഹോസ്റ്റലിൽ നിന്ന് ഒളിച്ചോടി വിദ്യാർത്ഥികൾ. ആന്ധ്രാപ്രദേശിലെ വിശാഖപട്ടണത്തിലാണ് സംഭവം നടന്നത്. സെന്റ് ആൻസ് ഹെെസ്കൂളിലെ ഒൻപതാം ക്ലാസ് വിദ്യാർത്ഥികളായ നാല് പേരാണ് ഹോസ്റ്റലിൽ നിന്ന് ഓളിച്ചോടിയത്. ഹോസ്റ്റലിലെ ഗേറ്റ് ചാടിക്കടന്ന് ഇവർ പോകുന്നതിന്റെ സിസിടിവി ദൃശ്യങ്ങൾ പുറത്തുവന്നു.

'ലക്കി ഭാസ്കർ' സിനിമയിലെ ദുൽഖർ ഏറെ സ്വാധീനിച്ചെന്നും അതിലെ പോലെ നിറയെ സമ്പാദിച്ച് കാറും വീടുമൊക്കെ വാങ്ങാൻ കഴിയുന്ന അവസ്ഥയിലെത്തിയതിന് ശേഷമേ തിരിച്ചു വരൂവെന്നുമാണ് ഇവർ സുഹൃത്തുക്കളോട് പറഞ്ഞത്. കിരൺ കുമാർ, കാർത്തിക്, ചരൺ തേജ, രഘു എന്നിവരാണ് ഒളിച്ചോടിയതെന്ന് പൊലീസ് പറയുന്നു. ഇവർക്കുവേണ്ടിയുള്ള തെരച്ചിലിലാണ് പൊലീസ്.

മഹാരാണിപ്പെട്ടിലെ വിസാഗിലുള്ള ഹോസ്റ്റലിലാണ് ഇവർ താമസിച്ചിരുന്നത്. ബാഗുമായി ഹോസ്റ്റലിന്റെ മതിൽ ചാടുന്നതും റോഡിലൂടെ വിദ്യാർത്ഥികൾ ഓടിപോകുന്നതും പുറത്തുവന്ന വീഡിയോയിൽ ഉണ്ട്. ഡിസംബർ ഒമ്പതിന് രാവിലെ 6. 20 ഓടെയാണ് ഇവർ രക്ഷപ്പെട്ടിരിക്കുന്നത്. സംഭവത്തിൽ കുട്ടികളുടെ മാതാപിതാക്കളാണ് പൊലീസിൽ പരാതി നൽകിയത്.

BREAKING - Four 9th-grade students from St. Ann's High School, Visakhapatnam, escaped their hostel after watching @dulQuer's #LuckyBaskhar, they told their friends they would return after earning money to buy cars and houses, inspired by #DulquerSalmaan's character in the film pic.twitter.com/X4iUa6bjc9

— Daily Culture (@DailyCultureYT) December 10, 2024

ദുൽഖർ സൽമാൻ നായകനായ പാൻ ഇന്ത്യൻ തെലുങ്ക് ചിത്രമാണ് ലക്കി ഭാസ്കർ. തെലുങ്ക്, തമിഴ്, മലയാളം, കന്നഡ, ഹിന്ദി ഭാഷകളിൽ റിലീസ് ചെയ്ത ചിത്രം എല്ലാ ഭാഷകളിലും സൂപ്പർ ഹിറ്റായിരുന്നു. മീനാക്ഷി ചൗധരിയാണ് നായിക.വെങ്കി അറ്റ്ലൂരിയാണ് രചനയും സംവിധാനവും നിർവഹിച്ചത്.