നമ്മളോരോരുത്തരുടെയും നിത്യജീവിതത്തിലെ പ്രധാന വസ്തുവാണ് സ്മാർട്ഫോണുകൾ. കോൾ ചെയ്യാനും മെസേജ് അയക്കാനും വാട്സാപ്പ് നോക്കാനും പണമയയ്ക്കാനും എന്തിന് ബോറഡി മാറ്റാൻ റീൽസ് കാണാൻ വരെ ഫോൺ നമ്മുടെ സന്തത സഹചാരിയാണ്. അത്യാവശ്യ സമയങ്ങളിൽ ഫോണിൽ ബാറ്ററി നിൽക്കാതെ വരികയോ സ്വിച്ചോഫായി പോകുകയോ ഒക്കെ ചെയ്താൽ നമ്മുടെ പകുതി ജീവൻ നിലച്ചതുപോലെയാണ് പലപ്പോഴും തോന്നുക. എന്നാൽ ഇനി ബാറ്ററി പെട്ടെന്ന് തീരാതെ ബാറ്ററി ലൈഫ് വർദ്ധിപ്പിക്കാൻ കഴിയും.
ആപ്പിളാണ് പുതിയ ഐഫോണിൽ എങ്ങനെ ബാറ്ററി കാലാവധി വർദ്ധിപ്പിക്കാം എന്ന് വ്യക്തമാക്കുന്നത്. സെറ്റിംഗ്സിൽ മൂന്നേ മൂന്ന് കാര്യങ്ങൾ ശ്രദ്ധിച്ചാൽ മാത്രം മതി. ആദ്യമായി നോക്കേണ്ടത് ഓട്ടോ ബ്രൈറ്റ്നസ് സംവിധാനം ഓഫാക്കാനാണ്.
ചുറ്റുപാടുമുള്ള വെളിച്ചത്തിനനുസരിച്ച് ഫോണിന്റെ ബ്രൈറ്റ്നസ് സ്വയം ഫോൺ ക്രമീകരിക്കുന്നതാണ് ഓട്ടോ ബ്രൈറ്റ്നസ്. ബിൽറ്റ് ഇൻ ലൈറ്റ് സെൻസറുകൾ ഉള്ളവയാണ് ഐഫോണുകൾ. ഇവ ചുറ്റുമുള്ള വെളിച്ചത്തിനനുസരിച്ച് വായനാക്ഷമത വർദ്ധിപ്പിക്കുകയും കണ്ണുകൾക്ക് ആയാസം കുറയ്ക്കുകയും ചെയ്യും. ഇത് ചെയ്യാൻ ആദ്യം സെറ്റിംഗ്സ് അമർത്തുക. ശേഷം ആക്സസിബിലിറ്റിയിൽ അമർത്തുക. ഇനി ഡിസ്പ്ളേ ആന്റ് ആക്സെസിബിലിറ്റി സെലക്ട് ചെയ്യുക. ഡിസ്പ്ളേ ആന്റ് ടെക്സ്റ്റ് സൈസ് തെരഞ്ഞെടുക്കുക. ഇതിൽ ഓട്ടോ ബ്രൈറ്റ്നസ് ഓഫാകും. അപ്പോൾ ഓരോ തവണയും ചുറ്റുപാടിനനുസരിച്ച് ബ്രൈറ്റ്നസ് ക്രമീകരിക്കുന്നത് നിൽക്കും. ബാറ്ററി കാലാവധി സംരക്ഷിക്കാനും സാധിക്കും. രാത്രിയിൽ നൈറ്റ്ഷിഫ്റ്റ് ഓണാക്കിയിടുന്നതും നല്ലത്.
ഓട്ടോ ലോക്ക് സംവിധാനം ഓൺചെയ്തുവയ്ക്കുന്നതും ഫോണിന്റെ ബാറ്ററി കാലാവധി കൂട്ടാൻ സഹായിക്കും. സെറ്റിംഗ്സിൽ ഡിസ്പ്ളേ ആന്റ് ബ്രൈറ്റ്നസ് എന്നത് അമർത്തുക. ഇതിൽ ഓട്ടോ ലോക്ക് ഉണ്ട്. സമയക്രമം സെറ്റ് ചെയ്ത് ഓൺ ചെയ്താൽ അനാവശ്യമായി ബാറ്ററി നഷ്ടമാകുന്നത് തടയാം.
ലൊക്കേഷൻ സർവീസുകൾ ഓഫ് ചെയ്യുന്നത് അടുത്തവഴി. ലൊക്കേഷൻ ഓൺചെയ്യുമ്പോൾ ജിപിഎസ് വഴി ധാരാളം ബാറ്ററി ചോരും. സെറ്റിംഗ്സിൽ പ്രൈവസി ആന്റ് സെക്യൂരിറ്റി എന്ന ഭാഗത്ത് സെലക്ട് ചെയ്താൽ ലൊക്കേഷൻ സർവീസസ് എന്നത് കാണാം. ഈ ഓപ്ഷൻ ഓഫ് ചെയ്താൽ ഒരു പരിധിവരെ ബാറ്ററി കാലാവധി വർദ്ധിപ്പിക്കാൻ കഴിയും. ഈ കാര്യങ്ങൾ ചെയ്യുന്നത് ഏറെ ഗുണപ്രദം ആണെങ്കിലും സ്വന്തം ആവശ്യങ്ങൾക്ക് അനുസരിച്ച് അവ ക്രമീകരിക്കുന്നത് തന്നെയാണ് ഓരോ ആളുകൾക്കും നല്ലത്.
അപ്ഡേറ്റായിരിക്കാം ദിവസവും
ഒരു ദിവസത്തെ പ്രധാന സംഭവങ്ങൾ നിങ്ങളുടെ ഇൻബോക്സിൽ |