അന്താരാഷ്ട്ര പുസ്‌തകോത്സവത്തിൽ ഹിറ്റായി കുടുംബശ്രീ ഫുഡ് കോർട്ട്

തിരുവനന്തപുരം: കേരള നിയമസഭയുടെ പുസ്‌തകോത്സവത്തോടനുബന്ധിച്ച് കുടുംബശ്രീ ജില്ലാ മിഷൻ സംഘടിപ്പിച്ച കഫേ കുടുംബശ്രീ ഫുഡ് കോർട്ടിന് മികച്ച പ്രതികരണം.രാമശ്ശേരി ഇഡ്ഡലി,അട്ടപ്പാടി മേഖലയിലെ വനസുന്ദരി ചിക്കൻ എന്നിവയ്ക്കായിരുന്നു ആവശ്യക്കാർ ഏറെ.നാടൻ വിഭവങ്ങൾ,​വ്യത്യസ്ത ജ്യൂസുകൾ,മോമോസ്,​ബിരിയാണി എന്നിവയും വിളമ്പി.

ഫുഡ് കോർട്ടിൽ നിന്ന് 23 ലക്ഷം രൂപയും,കാറ്ററിംഗ് ഓർഡർ മുഖേന ഏഴ് ലക്ഷം രൂപയും ചേർത്ത് 30 ലക്ഷം രൂപ കുടുംബശ്രീ സംരംഭകർക്ക് നേടാനായി.ജില്ലയിലെ പ്രത്യാശ,​കോട്ടയം ജില്ലയിലെ എ വൺ,​എറണാകുളം ജില്ലയിലെ ലക്ഷ്യ,​പാലക്കാട് അട്ടപ്പാടിയിലെ സോലെ കഫേ,​ പാലക്കാട് രാമശ്ശേരി യൂണിറ്റ്,​ കണ്ണൂർ ജില്ലയിലെ വെൺമ,​കോഴിക്കോട് ജില്ലയിലെ സൗപർണിക എന്നിങ്ങനെ ഏഴ് യൂണിറ്റുകളാണ് ഫുഡ് കോർട്ടിൽ പങ്കെടുത്തത്.