സിന്നർ എന്നാ പവറാന്നേ...

യാന്നിക്ക് സിന്നർ, ഇഗ ഷ്വാംടെക് ഓസ്ട്രേലിയൻ ഓപ്പൺ ക്വാർട്ടറിൽ

മെൽബൺ : ഓസ്ട്രേലിയൻ ഓപ്പണിൽ മുൻനിര താരങ്ങളായ യാന്നിക്ക് സിന്നറും ഇഗ ഷ്വാംടെക്കും ക്വാർട്ടർ ഫൈനലിലെത്തി. ഇന്നലെ നടന്ന പുരുഷ സിംഗിൾസിലെ പ്രീ ക്വാർട്ടറിൽ ടോപ് സീഡായ സിന്നർ 13-ാം സീഡ് ഡെന്മാർക്ക് താരം ഹോൾഗർ റൂണെയെയാണ് കീഴടക്കിയത്. നാലുസെറ്റ് നീണ്ട നാലാം റൗണ്ട് പോരാട്ടത്തിൽ 6-3,3-6,6-3,6-2 എന്ന സ്കോറിനായിരുന്നു സിന്നറുടെ ജയം. ആദ്യ സെറ്റ് നിസാരമായി നേടിയ സിന്നറെ രണ്ടാം സെറ്റിൽ റൂണെ തടഞ്ഞുനിറുത്തിയെങ്കിലും മത്സരഫലം മാറ്റി മറിക്കാനായില്ല. പുരുഷ വിഭാഗത്തിലെ മറ്റൊരു പ്രീ ക്വാർട്ടറിൽ ഓസ്ട്രേലിയൻ താരം ഡി മിനേയുർ 6-0,7-6,6-3ന് അമേരിക്കയുടെ മൈക്കേൽസണിനെ തോൽപ്പിച്ച് ക്വാർട്ടറിലെത്തി.

വനിതാ സിംഗിൾസ് പ്രീ ക്വാർട്ടറിൽ രണ്ടാം സീഡായ ഇഗ ജർമ്മൻ താരം ഇവ ലൈസിനെ 6-0,6-1 എന്ന സ്കോറിന് തകർത്തെറിഞ്ഞാണ് അവസാന എട്ടിലേക്ക് കടന്നത്. എട്ടാം സീഡ് എമ്മ നവാരോയാണ് ക്വാർട്ടറിൽ ഇഗയുടെ എതിരാളി. 28-ാം സീഡ് എലിന സ്വിറ്റോളിന 6-4,6-1ന് കുദർമെറ്റോവയെ തോൽപ്പിച്ച് ക്വാർട്ടറിലേക്ക് കടന്നു.

വലതുളച്ച് സിന്നറുടെ സർവ്

ഇന്നലെ ഹോൾഗർ റൂണെയ്ക്ക് എതിരായ മത്സരത്തിനിടെ യാന്നിക്ക് സിന്നറുടെ ഒരു സർവ് കോർട്ടിലെ നെറ്റ് തുളച്ചാണ് പോയത്. ഗ്രൗണ്ട് സ്റ്റാഫ് ഇടപെട്ട് നെറ്റ് പൂർവസ്ഥിതിയിലാക്കുന്ന ദൃശ്യങ്ങൾ വൈറലായിരുന്നു.