16 അല്ല 20 കോച്ചുകൾ; തിരുവനന്തപുരത്ത് നിന്ന് അതിവേഗം കാസർകോടെത്താം, മലയാളികൾക്ക് ആശ്വാസം

ന്യൂഡൽഹി: കൂടുതൽ യാത്രക്കാരെ ഉൾക്കൊള്ളാൻ സാധിക്കുന്ന പുതിയ വന്ദേഭാരത് ട്രെയിനുകൾ അവതരിപ്പിച്ച് ഇന്ത്യൻ റെയിൽവേ. 20 കോച്ചുകളുളള വന്ദേഭാരത് ട്രെയിനുകളാണ് കേരളത്തിൽ അവതരിപ്പിച്ചത്. മുൻപ് സർവീസ് നടത്തിയിരുന്ന 16 കോച്ചുകളുളള വന്ദേഭാരത് ട്രെയിനുകൾക്ക് പകരമാണിത്. 20634/20633 എന്ന നമ്പറിലുളള വന്ദേഭാരത് ട്രെയിൻ തിരുവനന്തപുരം സെൻട്രലിൽ നിന്ന് കാസർകോട്ടേക്കാണ് സർവീസ് നടത്തുന്നത്.

ഈ ട്രെയിൻ എട്ട് മണിക്കൂർ അഞ്ച് മിനിട്ട് കൊണ്ട് സർവീസ് പൂർത്തിയാക്കും. ഈ റൂട്ടിലെ ഏ​റ്റവും വേഗതയേറിയ ട്രെയിനാണിത്. വ്യാഴാഴ്ച ഒഴികെയുളള എല്ലാ ദിവസങ്ങളിലും വന്ദേഭാരത് സർവീസ് നടത്തും. ജനുവരി പത്ത് മുതൽ സർവീസ് ആരംഭിച്ചിട്ടുണ്ട്. കൊല്ലം, ചെങ്ങന്നൂർ, കോട്ടയം,എറണാകുളം ടൗൺ, തൃശൂർ, ഷൊർണൂർ, കോഴിക്കോട്, കണ്ണൂർ എന്നിവിടങ്ങളിൽ മാത്രമാണ് സ്​റ്റോപ്പുകൾ അനുവദിച്ചിട്ടുളളത്. 20634 ട്രെയിൻ തിരുവന്തപുരം സെൻട്രലിൽ നിന്ന് പുലർച്ചെ 5.15ന് പുറപ്പെട്ട് ഉച്ചയ്ക്ക് 1.20ന് കാസർകോട് എത്തിച്ചേരും. തിരികെ 20633 ട്രെയിൻ കാസർകോട് നിന്ന് ഉച്ചയ്ക്ക് രണ്ടരയ്ക്ക് പുറപ്പെട്ട് രാത്രി 10.40ഓടെ തിരുവനന്തപുരം സെൻട്രലിൽ എത്തിച്ചേരും.

രണ്ടാമത്തെ ട്രെയിനായ 20833/20834 വിശാഖപട്ടണത്ത് നിന്ന് സെക്കന്തരാബാദിലേക്ക് പോകുന്ന ട്രെയിനാണ് രണ്ടാമത്തേത്. എട്ട് മണിക്കൂറും 35 മിനിട്ടും കൊണ്ടും 699 കിലോമീ​റ്റർ പിന്നിടും. ഈ റൂട്ടിലൂടെ സർവീസ് നടത്തുന്ന അതിവേഗ ട്രെയിനാണിത്. ചൊവ്വാഴ്ച ഒഴികെ എല്ലാ ദിവസങ്ങളിലും ഈ ട്രെയിൻ ഉണ്ടാകും. ജനുവരി 11 മുതൽ സർവീസ് ആരംഭിച്ചിട്ടുണ്ട്. സമാൾകോട്ട് ജംഗ്ഷൻ, രാജമുണ്ട്‌രി,വിജയവാഡ, ഖമ്മാം, വാരംഗൽ തുടങ്ങിയ സ്ഥലങ്ങളിൽ സ്‌​റ്റോപ്പുകൾ അനുവദിച്ചിട്ടുണ്ട്. 20833 ട്രെയിൻ പുലർച്ചെ 5.45ന് വിശാഖപട്ടണത്തുനിന്ന് പുറപ്പെട്ട് ഉച്ചയ്ക്ക് 2.20ന് സെക്കന്തരാബാദിൽ എത്തിച്ചേരും. 20834 ട്രെയിൽ ഉച്ചയ്ക്ക് മൂന്ന് മണിക്ക് സെക്കന്തരാബാദിൽ നിന്ന് പുറപ്പെട്ട് രാത്രി 11.35ന് വിശാഖപട്ടണത്ത് എത്തിച്ചേരും.