വീടുകളിലെ ഗോവണികൾ പ്രദക്ഷിണ ദിശയിൽ വേണം എന്ന് പറയുന്നതിന് പിന്നിൽ

കേരളത്തിലെ വാസ്തു വിദ്യയുമായി ബന്ധപ്പെട്ട് നിരവധിയായ പ്രചണങ്ങളുണ്ട്. അതിലൊന്നാണ് ഗോവണിയെ പരാമർശിച്ചുകൊണ്ടുള്ളത്. വീടുകളിലെ ഗോവണികൾ പ്രദക്ഷിണ ദിശയിൽ വേണം എന്ന് പറയുന്നതിന് പിന്നിലെ കാരണം പറയുകയാണ് പ്രമുഖ ആർക്കിടെക്‌ട് സുരേഷ് മഠത്തിൽ വളപ്പിൽ.

സുരേഷ് മഠത്തിൽ വളപ്പിൽ എഴുതിയത്-

" അപ്രദിക്ഷണം അശുഭകരമാണ്, വിവാഹത്തിന് കതിർമണ്ഡപത്തിൽ പ്രദക്ഷിണം വെക്കുന്നതും, ദേവാലയങ്ങളിൽ പ്രദക്ഷിണം വെക്കുന്നതും അതിനാലാണ്."

" അതുകൊണ്ടാണ് വീടുകളിലെ ഗോവണികൾ പ്രദക്ഷിണ ദിശയിൽ വേണം എന്ന് പറയുന്നത് "

ആ വാസ്തുവിദ്യാ വിദഗ്ദൻ പറഞ്ഞു നിർത്തി.

" ആര് പറയുന്നത് ..? എവിടെയാണ് അങ്ങനെ പറയുന്നത് ..? ഞാൻ ഒരു മറുചോദ്യം എറിഞ്ഞു.

" കേരളത്തിലെ വാസ്തുവിദ്യക്ക് ആധാരമായ മനുഷ്യാലയ ചന്ദ്രികയിൽ അങ്ങനെ പറയുന്നുണ്ടോ ..? " ഞാൻ ചോദിച്ചു.

മറുപടിയില്ല.

" മയമതം ..? മാനസാരം ..? ബൃഹദ് സംഹിത ..? എവിടെയെങ്കിലും പറയുന്നുണ്ടോ ..?"

അയാൾ തല ചൊറിഞ്ഞു.

" കേരളത്തിലെ എത്രയോ എണ്ണം പറഞ്ഞ കോവിലകങ്ങളിൽ, കൊട്ടാരങ്ങളിൽ, മനകളിൽ അപ്രദിക്ഷണ ദിശയിൽ ഗോവണികൾ ഉണ്ട്. ഇത് പണിയിച്ചവർക്കു ആർക്കും ഇല്ലാതിരുന്ന ഇങ്ങനെയൊരു നിയമം നിങ്ങൾക്ക് എവിടെനിന്നു കിട്ടി ..?"

കൂടുതൽ ഗുസ്തിക്ക് നിൽക്കാതെ അയാൾ എന്തൊക്കെയോ പിറുപിറുത്തുകൊണ്ട് സ്ഥലം വിട്ടു. ആ പണിസ്ഥലത്ത് ഞാൻ ഒറ്റക്കായി.

" ശ് .."

ആരോ വിളിക്കുന്നുണ്ട്.

ഞാൻ ചുറ്റും നോക്കി, അവിടെയെങ്ങും ആരുമില്ല.

" ഇവിടെ, താഴെ നിന്നാണ് .. ഇങ്ങോട്ട് നോക്കൂ " മധുരമാർന്ന ഒരു സ്ത്രീ ശബ്ദമാണ്.

ഞാൻ കാൽചുവട്ടിലേക്കു നോക്കി. ഭൂമീ ദേവിയാണ്.

" പടിഞ്ഞാറുനിന്നും കിഴക്കോട്ട്‌ അപ്രദിക്ഷണ ദിശയിൽ കറങ്ങുന്ന ഭൂമിയിൽ നിന്നുകൊണ്ടാണല്ലോ ഇവർ ഇതൊക്കെ ചെയ്യുന്നത് എന്ന് മാത്രമാണ് ആകെയുള്ള ഒരു റിലാക്സേഷൻ "

ഭൂമീ ദേവി പറഞ്ഞു നിർത്തി.

" ഇവന്മാരെ ഒക്കെ ഇതുപോലെ ഓടിക്കണം" അതും പറഞ്ഞു ദേവി എനിക്കൊരു ഷെയ്ക്ക് ഹാൻഡ് തന്നു.

പിന്നെ അപ്രത്യക്ഷയായി.

ഞാൻ കണ്ടതാണ്.

ഞാനേ കണ്ടുള്ളൂ ...