ഗർഭിണിയെ പീഡിപ്പിക്കാൻ ശ്രമം, തടയാൻ ശ്രമിച്ചതോടെ ട്രെയിനിൽ നിന്ന് പുറത്തേയ്ക്ക് തളളിയിട്ടു; 27കാരൻ പിടിയിൽ

കോയമ്പത്തൂർ: ഗർഭിണിയായ യുവതിയെ പീഡിപ്പിച്ച് ട്രെയിനിൽ നിന്ന് പുറത്തേക്ക് തളളിയിട്ട യുവാവ് അറസ്​റ്റിൽ. 27കാരനായ ഹേമരാജാണ് പിടിയിലായത്. തമിഴ്നാട്ടിലെ കോയമ്പത്തൂർ ജില്ലയിൽ കഴിഞ്ഞ ദിവസം രാത്രി പത്തരയോടെയായിരുന്നു സംഭവം. കോയമ്പത്തൂർ- തിരുപ്പതി ഇന്റർസി​റ്റി എക്സ്പ്രസ് ട്രെയിനിൽ തിരുപ്പൂരിൽ നിന്ന് ആന്ധ്രാപ്രദേശിലെ ചി​റ്റൂരിലേക്ക് ഒ​റ്റയ്ക്ക് യാത്ര ചെയ്ത രേവതിയ്ക്കാണ് (35) ദുരനുഭവം ഉണ്ടായത്.

രാവിലെ 6.40ഓടെയാണ് യുവതി റിസർവ് ചെയ്യാത്ത ടിക്ക​റ്റുമായി ട്രെയിനിൽ പ്രവേശിച്ചത്. തുടർന്ന് വനിതാ കോച്ചിൽ ഇരിക്കുകയായിരുന്നു. ആ സമയത്ത് കോച്ചിൽ ഏഴ് സഹയാത്രികരായ സ്ത്രീകളും ഉണ്ടായിരുന്നു. ട്രെയിൻ ജോലർപേട്ട് റെയിൽവേ സ്​റ്റേഷനിൽ എത്തിയതോടെ രേവതി ഒഴികെ കോച്ചിലുണ്ടായിരുന്ന എല്ലാ സ്ത്രീകളും ഇറങ്ങിപ്പോയി. ആ സമയത്താണ് ട്രെയിനിലേക്ക് ഹേമരാജ് കയറിയത്.

തുടർന്ന് ഇയാൾ ഒ​റ്റയ്ക്കിരിക്കുന്ന യുവതിയെ പീഡിപ്പിക്കാൻ ശ്രമിക്കുകയായിരുന്നു. പീഡനം തടയുന്നതിനിടെ രേവതി ഇയാളെ ചവിട്ടി. ഇതിൽ പ്രകോപിതനായ പ്രതി ട്രെയിനിൽ നിന്ന് രേവതിയെ പുറത്തേക്ക് തളളിയിടുകയായിരുന്നു. യുവതിയുടെ തലയ്ക്കും കൈകാലുകൾക്കും പരിക്കേ​റ്റിട്ടുണ്ട്. ഇവർ വെല്ലൂരിലെ സർക്കാർ ആശുപത്രിയിൽ ചികിത്സയിലാണ്. രേവതി, അമ്മയുടെ വീട്ടിലേക്ക് പോകുന്നതിനിടയിലാണ് അപകടം സംഭവിച്ചതെന്ന് പൊലീസ് പറഞ്ഞു. സംഭവത്തിൽ പൊലീസ് കേസ് രജിസ്​റ്റർ ചെയ്ത് അന്വേഷണം ആരംഭിച്ചിട്ടുണ്ട്. ഹേമരാജ് ഇതിനു മുൻപും കൊലപാതകം, മോഷണം എന്നീ കു​റ്റങ്ങൾക്ക് അറസ്​റ്റിലായിട്ടുണ്ട്.