200 രൂപ കൈയിലുണ്ടെങ്കിൽ 20 ലക്ഷം അക്കൗണ്ടിലേക്കെത്തിക്കാം, ഒപ്പം 30 ലക്ഷത്തിന്റെ ബോണസും; ഉഗ്രൻ പദ്ധതി

നിങ്ങളുടെ വരുമാനം എത്ര ചെറുതോ വലുതോ ആയിക്കോട്ടെ, അതിൽ നിന്നും വീണ്ടും ലാഭം നേടിയെടുക്കാൻ സഹായിക്കുന്ന ഒട്ടനവധി നിക്ഷേപപദ്ധതികൾ ഉണ്ട്. കൂടുതൽ ലാഭവും ആരോഗ്യപരിരക്ഷയും നൽകുന്ന ഒട്ടനവധി പദ്ധതികൾ ലൈഫ് ഇൻഷുറൻസ് കോർപറേഷൻ ഒഫ് ഇന്ത്യയുടെ (എൽഐസി) കീഴിൽ ഉണ്ട്. അത്തരത്തിലുളള ഒരു പദ്ധതിയാണ് ജീവൻ ആനന്ദ് പോളിസി. നിരവധി ആനുകൂല്യങ്ങളും ഈ പദ്ധതിയിലൂടെ നിക്ഷേപകന് ലഭ്യമാകും.

ഈ പദ്ധതിയിൽ പ്രതിദിനം 200 രൂപയിൽ താഴെ നിക്ഷേപിച്ച് 20 ലക്ഷം രൂപയുടെ ലാഭം ഉണ്ടാക്കാൻ സാധിക്കും. വലിയ തുക ലാഭിക്കണമെങ്കിൽ നിങ്ങളുടെ നിക്ഷേപിക്കുന്ന തുക കൂട്ടിയാലും മതി. ഈ പദ്ധതിയിൽ, സം അഷ്വേർഡ് കുറഞ്ഞത് ഒരു ലക്ഷം രൂപയാണ്. നിക്ഷേപത്തിന് പരമാവധി പരിധിയില്ല.

നിക്ഷേപം

ജീവൻ ആനന്ദ് പോളിസിയിൽ പ്രായവും സമയപരിധിയും പ്രധാനപ്പെട്ട ഘടകങ്ങളാണ്. ഉദാഹരണത്തിന് നിങ്ങൾക്ക് ഇപ്പോൾ 21 വയസുണ്ടെന്ന് കരുതുക. 20 ലക്ഷം രൂപയുടെ ലാഭം സൃഷ്ടിക്കുന്നതിന്, 30 വർഷത്തേക്ക് എല്ലാ മാസവും 5922 രൂപ, അതായത് പ്രതിദിനം ഏകദേശം 197 രൂപ നിക്ഷേപിക്കേണ്ടിവരും. ഈ പ്രീമിയം ആദ്യ വർഷത്തേക്കായിരിക്കും. രണ്ടാം വർഷം മുതൽ, എല്ലാ മാസവും 5795 രൂപ, അതായത് ഏകദേശം 193 രൂപ പ്രീമിയം അടയ്ക്കേണ്ടിവരും. ഇതിൽ മാസംതോറുമോ അല്ലെങ്കിൽ മൂന്ന് മാസത്തിലൊരിക്കലോ ആറ് മാസത്തിലൊരിക്കലോ നിക്ഷേപം നടത്തിയാൽ മതി.

ഈ പദ്ധതിക്ക് 30 വർഷത്തെ കാലാവധി ഉണ്ട്. കാലാവധി കഴിയുന്നതിന് മുൻപ് നിക്ഷേപകന്റെ ജീവന് എന്തെങ്കിലും സംഭവിച്ചാൽ നോമിനിക്ക് അടിസ്ഥാന സം അഷ്വേർഡ് തുകയുടെ 125ശതമാനം അല്ലെങ്കിൽ മരണം വരെ അടച്ച പ്രീമിയങ്ങളുടെ 105ശതമാനം ലഭിക്കും. ഈ പദ്ധതിയിൽ നിങ്ങൾക്ക് ബോണസിന്റെ ആനുകൂല്യവും ലഭിക്കും. 30 വർഷത്തേക്ക് പ്രതിദിനം ഏകദേശം 200 രൂപ നിക്ഷേപിച്ചാൽ ഏകദേശം 30 ലക്ഷം രൂപ ബോണസ് ലഭിക്കും. കൂടുതൽ വിവരങ്ങൾ അടുത്തുളള എൽഐസി സ്ഥാപനം സന്ദർശിച്ച് വിവരം തേടുക.