എട്ട് ലക്ഷം വിലയുള്ള ഓസ്‌ട്രിയൻ ബ്രാൻഡ് സൂപ്പർ ബൈക്ക് ഗ്യാരേജിലെത്തിച്ച് നടൻ മാധവൻ, ഇന്ത്യയിൽ സ്വന്തമാക്കുന്ന ആദ്യയാൾ

ഒരു അറിയപ്പെടുന്ന ബൈക്ക് പ്രേമിയാണ് പ്രശസ്‌ത നടനും സംവിധായകനുമായ ആർ. മാധവൻ. 1700സിസി വി4 1997ബിഎച്ച്‌പി യമഹ വി മാക്‌സ്, 1811സിസി ഇൻഡ്യൻ റോഡ്‌മാസ്‌റ്റർ, ഹോണ്ടയുടെ ഫ്ളാഗ്‌ഷിപ്പ് മോട്ടോർബൈക്ക് ആയ ഹോണ്ട ഗോൾഡ് വിംഗ്, ട്രയംഫ് റോക്കറ്റ് അങ്ങനെ നിരവധി സൂപ്പർ ബക്കുകൾ മാധവന്റെ ഗ്യാരേജിലുണ്ട് ഇക്കൂട്ടത്തിൽ ഏറ്റവും പുതിയതായി എത്തുന്ന സൂപ്പർ ബൈക്ക് ഇന്ത്യയിൽ ആദ്യം സ്വന്തമാക്കുന്നത് മാധവനാണ്. ഓസ്‌ട്രേലിയൻ മോട്ടോർ സൈക്കിൾ ബ്രാൻഡായ ബ്രിക്‌സ്‌റ്റണിന്റെ ക്രോംവെൽ 1200 ആണ് മാധവൻ സ്വന്തമാക്കിയത്.

ബ്രിക്‌സ്റ്റൺ ഇന്ത്യ ഇൻസ്റ്റഗ്രാം പേജിൽ ഷെയർ ചെയ്‌ത ചിത്രങ്ങളിൽ മാധവൻ സൂപ്പർ ബൈക്കിലിരിക്കുന്ന സ്റ്റൈലിഷ് ചിത്രങ്ങൾ കാണാം. ബ്രിക്‌സ്റ്റൺ ക്രോംവെൽ 1200 ഇന്ത്യയിൽ ലോഞ്ച് ചെയ്‌തത് കഴിഞ്ഞ വർഷമാണ്. 7.84 ലക്ഷം രൂപയാണ് ഈ സൂപ്പർ ബൈക്കിന്റെ എക്‌സ് ഷോറൂം വില. ക്ളാസിക് മോട്ടോർ സൈക്കിൾ ഫീച്ചറുകളുള്ള ക്രോംവെൽ 1200ന് റൗണ്ട് എൽഇ‌ഡി ഹെഡ്‌ലൈറ്റുകളാണ് ഉള്ളത്.

ഫ്ളാറ്റ് സിംഗിൾ സീറ്റും ടിഎഫ്‌ടി ഡിസ്‌പ്ളേയുള്ള ഇൻസ്‌ട്രുമെന്റ് ക്ളസ്‌ടറും ട്രാക്‌ഷൻ കൺട്രോൾ, ക്രൂയിസ് കൺട്രോൾ, റൈഡ് മോഡുകൾ അങ്ങനെ ഫീച്ചറുകളുണ്ട്. 1222 സിസി ലിക്വിഡ് കൂൾഡ് ട്വിൻ സിലിണ്ടർ എഞ്ചിൻ 82 ബിഎച്ച്‌പി ഒപ്പം 108എൻഎം പീക്ക് ടോർക്കും നൽകും. ആറ് സ്‌പീഡ് ഗിയർ ബോക്‌സുള്ള ക്രോംവെൽ 1200ന് പരമാവധി വേഗത 198 കിലോമീറ്ററാണ്. 21.7 ആണ് ഇന്ധനക്ഷമത കമ്പനി നൽകുന്നത്.