മുത്തൂറ്റ് ഫിനാൻസിന് റെക്കാഡ് അറ്റാദായം

ഒക്‌ടോബർ-ഡിസംബർ കാലയളവിൽ 3908 കോടി രൂപ അറ്റാദായം

കൊച്ചി: മുത്തൂറ്റ് ഫിനാൻസ് കൈകാര്യം ചെയ്യുന്ന മൊത്തം വായ്പാ ആസ്തികൾ ഏപ്രിൽ മുതൽ ഡിസംബർ വരെയുള്ള കാലയളവിൽ 34 ശതമാനം വർദ്ധനയോടെ 1,11,308 കോടി രൂപയിലെത്തി. മൂന്നാം ത്രൈമാസത്തിൽ സംയോജിത വായ്പാ ആസ്തികൾ ഏഴ് ശതമാനം വർദ്ധനയോടെ 7,159 കോടി രൂപയിലെത്തി. ആദ്യ ഒൻപതു മാസങ്ങളിലെ അറ്റാദായം വാർഷികാടിസ്ഥാനത്തിൽ 19 ശതമാനം ഉയർന്ന് 3908 കോടി രൂപയായി. ഒക്‌ടോബർ മുതൽ ഡിസംബർ വരെ കാലയളവിൽ അറ്റാദായം 21 ശതമാനം ഉയർന്ന് 1392 കോടി രൂപയായി. അവലോകന കാലയളവിൽ മികച്ച വളർച്ച നേടാനായതിൽ അഭിമാനമുണ്ടെന്ന് മുത്തൂറ്റ് ഗ്രൂപ്പ് ചെയർമാൻ ജോർജ് ജേക്കബ് മുത്തൂറ്റ് പറഞ്ഞു.

സ്വർണ പണയ മേഖലയിൽ 29 ശതമാനം വളർച്ചയോടെ വായ്പാ ആസ്തികളിൽ 26,305 കോടി രൂപയുടെ വളർച്ച കൈവരിക്കാനായെന്ന് മുത്തൂറ്റ് ഫിനാൻസ് മാനേജിംഗ് ഡയറക്ടർ ജോർജ് അലക്സാണ്ടർ മുത്തൂറ്റ് ചൂണ്ടിക്കാട്ടി.