കെ.എസ്.ആർ.ടി.സിയുടെ ഇന്ധന പമ്പിൽ ഉറങ്ങിക്കിടന്നയാൾ ബസ് കയറി മരിച്ചു

കൊച്ചി: എറണാകുളം കെ.എസ്.ആർ.ടി.സി ബസ് സ്റ്റേഷൻ വളപ്പിലെ പെട്രോൾ പമ്പിൽ നിലത്ത് ഉറങ്ങിക്കിടന്നയാൾ ബസ് ദേഹത്തു കയറി മരിച്ചു.

പമ്പിനടുത്തുള്ള തിട്ടയിൽ കിടന്നുറങ്ങുന്നതിനിടെ ഇയാൾ താഴെ വീണത് ആരുടെയും ശ്രദ്ധയിൽപ്പെട്ടില്ല. പുലർച്ചെ നാലിന് രാമക്കൽമേട്ടിലേക്ക് വിനോദ സഞ്ചാര ട്രിപ്പിനായി പോകാനിരുന്ന ബസ് ഡീസലടിക്കാൻ കയറ്റുന്നതിനിടെ ദേഹത്ത് കയറിയിറങ്ങുകയായിരുന്നു. സംഭവസ്ഥലത്ത് തന്നെ മരിച്ചു.

ഡീസലടിച്ച് ബസ് ട്രിപ്പിനായി പുറപ്പെട്ട ശേഷം പമ്പിലെ ജീവനക്കാരാണ് ജഡം കണ്ടത്. ബസ് തിരികെ സ്റ്റാൻഡിലെത്തിച്ച് ഫൊറൻസിക് പരിശോധനകൾക്ക് വിധേയമാക്കി. മരിച്ചയാളുടെ തിരിച്ചറിയൽ രേഖയിൽ ബിഹാറിലെ ഗയ സ്വദേശി രാജ്കുമാർ ശർമയെന്നാണ് പേര് കാണുന്നതെങ്കിലും പൊലീസ് സ്ഥിരീകരിച്ചിട്ടില്ല. ഗയ പൊലീസുമായി സെൻട്രൽ പൊലീസ് ബന്ധപ്പെട്ടിട്ടുണ്ട്.