'താരങ്ങൾക്ക് വലിയ ഹൈപ്പൊന്നും കൊടുക്കേണ്ട, ഞാനൊരു കൂലിപ്പണിക്കാരിയാണ്; തൊഴിൽ ചെയ്യാൻ കഴിവ് വേണം'

സിനിമയിൽ അഭിനയിക്കുന്നവർക്ക് വലിയ ഹൈപ്പ് കൊടുക്കേണ്ട ആവശ്യമില്ലെന്ന് നടി മഞ്ജു പത്രോസ്. എല്ലാവരും ജോലിയാണ് ചെയ്യുന്നതെന്നും അവർ പറഞ്ഞു. ജീവിതത്തിൽ അച്ഛനും അമ്മയുമല്ലാതെ മറ്റാരും തന്നെ ഇത്രയും സ്നേഹിച്ചിട്ടില്ലെന്നും നടി പങ്കുവച്ചു. കഴിവുണ്ടെങ്കിൽ മാത്രമേ ഏത് തൊഴിലും ചെയ്യാൻ സാധിക്കുകയുളളൂവെന്ന് അവർ പറഞ്ഞു. ഒരു ചാനലിന് അനുവദിച്ച അഭിമുഖത്തിലാണ് മഞ്ജു പത്രോസ് ഇക്കാര്യങ്ങൾ പങ്കുവച്ചത്.

'സിനിമയിൽ അഭിനയിക്കുന്നതും ഒരു തൊഴിലാണ്. ഒരു വ്യക്തി സാധാരണ ഒരു തൊഴിൽ ചെയ്യുന്നതു പോലെയാണ് സിനിമയിൽ അഭിനയിക്കുന്നത്. അല്ലാതെ വലിയൊരു ഹൈപ്പ് കൊടുക്കേണ്ട ആവശ്യമൊന്നുമില്ല. ഞാൻ എനിക്കറിയാവുന്ന ഒരു തൊഴിൽ ചെയ്യുന്നു. സിനിമയിൽ അഭിനയിക്കുന്നവരോട് എന്ത് തോന്നുന്നു എന്ന ചോദ്യത്തിന് യാതൊരു പ്രസക്തിയുമില്ല. വലിയ എന്തോ ഒരു സംഭവം ചെയ്തുവെന്ന് തോന്നേണ്ട ആവശ്യമൊന്നുമില്ല. ഞാൻ ഒരു കൂലിപ്പണിക്കാരിയാണെന്നാണ് ശക്തമായി വിശ്വസിക്കുന്നത്. ദിവസ വേതനത്തിന് ജോലി ചെയ്യുന്ന ഒരാളാണ് ഞാൻ. അങ്ങനെ വലിയ നന്ദിയൊന്നും തോന്നേണ്ട ഒരു സംഭവമൊന്നുമില്ല.

അഭിനയിക്കാൻ അറിയാവുന്ന ഒരുപാട് ആളുകൾ സിനിമയ്ക്ക് പുറത്ത് നിൽക്കുകയാണ്. അതിനിടയിൽ എനിക്ക് അഭിനയിക്കാൻ അവസരം തന്നതിൽ ദൈവത്തിനോട് നന്ദി പറയുന്നുണ്ട്. അതല്ലാതെ ഒന്നും മഹത്വവൽക്കരിക്കേണ്ട ആവശ്യമില്ല. ഏത് തൊഴിൽ ചെയ്യാനും കഴിവ് വേണം. അല്ലാതെ വലിയ ഒരു സംഭവത്തിൽ വന്നുനിൽക്കുന്നുവെന്ന തോന്നലില്ല. എനിക്ക് പട്ടിണിയില്ലാതെ ജീവിക്കാൻ ഒരു ജോലി തന്നതിൽ സന്തോഷമുണ്ട്. ഞാൻ അഭിനയിക്കുന്ന സീരിയലുകൾ മകനോ സഹോരദനോ കാണില്ല. പക്ഷെ അച്ഛനും അമ്മയും കൃത്യമായി കാണാറുണ്ട്. ഞാൻ അഭിനയിക്കുന്നത് വലിയ കൗതുകത്തോടെയാണ് അവർ ഇപ്പോഴും കാണുന്നത്. ഞങ്ങളെ കഷ്ടപ്പെട്ടാണ് അമ്മയും അച്ഛനും വളർത്തിയത്. ഇപ്പോഴുളള ആളുകൾ മക്കളെ ഉപേക്ഷിച്ച് പോകുമ്പോൾ അതിശയമാണ്. ഒരു നേരത്ത ഭക്ഷണം കഴിക്കാൻ പോലും കഴിയാത്ത അവസ്ഥ ഞങ്ങൾക്കുണ്ടായിരുന്നു'- മഞ്ജു പറഞ്ഞു.