പ്രീമിയം ജ്യൂസ് ഇനി 20 രൂപയ്ക്കും; പുതിയ നീക്കവുമായി മുകേഷ് അംബാനി, മുന്തിയ ബ്രാൻഡുകൾ ഇനി വിറയ്ക്കും

ബിസിനസ് രംഗത്തെ അടിത്തറ കൂടുതൽ ശക്തമാക്കാൻ ദിനംപ്രതി നിരവധി മാ​റ്റങ്ങൾ അവതരിപ്പിക്കുന്ന ശതകോടീശ്വരനായ വ്യവസായിയാണ് മുകേഷ് അംബാനി. അദ്ദേഹത്തിന്റെ ബിസിനസ് സാമ്രാജ്യമായ റിലയൻസ് ഇൻഡസ്ട്രീസ് രാജ്യത്തിന് അകത്തും പുറത്തും നിരവധി സ്ഥാപനങ്ങളുമായി സഹകരിച്ച് പ്രവർത്തിക്കുന്നുണ്ട്. ഇപ്പോൾ റിലയൻസ് കൺസ്യൂമർ പ്രോഡക്ട്സ് ലിമി​റ്റഡ് (ആർസിപിഎൽ) പ്രീമിയം ജ്യൂസ് ബ്രാൻഡായ സൺ ക്രഷിന്റെ ഇന്ത്യയിലെ വിതരണ അവകാശം ഏറ്റെടുത്തതായാണ് റിപ്പോർട്ടുകൾ.

മുൻ ശ്രീലങ്കൻ ക്രിക്ക​റ്റ് താരം മുത്തയ്യ മുരളീധരന്റെ കമ്പനിയായ സിലോൺ ബിവറേജ് ഇന്റർനാഷണലിൽ നിന്ന് ആർസിപിഎൽ ഇന്ത്യയിലെ വിപണിയുടെ നേതൃത്വം ഏ​റ്റെടുത്തിരിക്കുകയാണ്. അതുപോലെ പല വിദേശ ഉൽപ്പന്നങ്ങളുടെ ഇന്ത്യയുടെ ഓഹരിക്കായും റിലയൻസ് മത്സരിക്കുകയാണ്. ഐടിസിയിൽ നിന്നുളള ബി നാച്വറൽ,അമുൽ ട്രൂ, പെപ്‌സിക്കോയിൽ നിന്നുളള പേപ്പർബോട്ട്, ട്രോപ്പിക്കാന എന്നിവയുടെ ഓഹരികൾക്കായി റിലയൻസ് മത്സരിക്കുന്നുണ്ട്. 200 മില്ലിലി​റ്റർ സൺ ക്രഷിന് 20 രൂപ ഈടാക്കാനാണ് റിലയൻസ് നിലവിൽ പദ്ധതിയിട്ടിരിക്കുന്നത്. ഇത് മറ്റുളള പ്രീമിയം ജ്യൂസ് ബ്രാൻഡുകളുടെ ഇന്ത്യൻ വിപണിയെ ബാധിക്കുമോയെന്ന ആശങ്കയും ഉണ്ട്.

കൊക്കക്കോള സൗത്ത് ഈസ്​റ്റ് യൂറോപ്പിന്റെ മുൻ മാനേജിംഗ് ഡയറക്ടർ വികാസ് ചൗളയിൽ നിന്ന് രണ്ട് വർഷം മുൻപ് പ്രമുഖ ഡ്രിങ്കായ റാസ്‌കിക്കിന്റെ വിതരണ അവകാശം ഏ​റ്റെടുത്തുക്കൊണ്ടാണ് റിലയൻസ് ജ്യൂസ് വിപണിയിലേക്ക് റിലയൻസ് പ്രവേശിച്ചത്. 2030 ആകുമ്പോഴേയ്ക്കും ഇന്ത്യൻ പാനീയ വിപണി 1.47 ട്രില്യൺ രൂപയിലെത്തുമെന്നാണ് റിലയൻസിന്റെ പ്രതീക്ഷിക്കുന്നത്. ഇതിൽ കാർബണേ​റ്റഡ് സോഫ്​റ്റ് ഡ്രിങ്കുകൾ, ജ്യൂസുകൾ, കുപ്പിവെളളം എന്നിവയും ഉൾപ്പെടുന്നു. മാർച്ച് 18ലെ കണക്കനുസരിച്ച് റിലയൻസിന് 16.76 ലക്ഷം കോടിയുടെ വിപണി മൂലധനമുണ്ട്. ഫോർബ്സ് പട്ടികയനുസരിച്ച് മുകേഷ് അംബാനിയുടെ ആസ്തി 91.8 ബില്യൺ ഡോളറാണ്.