തക്കാളി, തേങ്ങാ ചട്‌നിയൊക്കെ മാറിനിൽക്കും; വെള്ളരി ചട്‌നി ഒന്ന് കഴിച്ചുനോക്കൂ

നല്ലൊരു ചമ്മന്തിയുണ്ടെങ്കിൽ അത് മാത്രം മതിയാകും മിക്കവർക്കും ചോറുണ്ണാൻ. ദോശ, ഇഡ്ഡലി, അപ്പം, പൂരി തുടങ്ങിയ വിഭവങ്ങൾക്കൊപ്പവും ചമ്മന്തി കഴിക്കാറുണ്ട്. തേങ്ങാ ചട്‌നി, തക്കാളി ചട്‌നി, മുളക് ചട്‌നി എന്നിങ്ങനെ പലതരത്തിലെ ചട്‌നികൾ നമ്മൾ കഴിക്കുകയും തയ്യാറാക്കുകയും ചെയ്യാറുണ്ട്. എന്നാൽ വെള്ളരിക്കകൊണ്ടുള്ള തക്കാളി എത്രപേർ കഴിച്ചിട്ടുണ്ട്? ഈ വെറെറ്റി റെസിപ്പി തയ്യാറാക്കുന്നത് എങ്ങനെയെന്ന് നോക്കിയാലോ?

ആവശ്യമായ ചേരുവകൾ

വെള്ളരി, നിലക്കടല, കടലപ്പരിപ്പ്, പച്ചമുളക്, വെളുത്തുള്ളി, ജീരകം, നാരങ്ങാനീര്, ഉപ്പ്, വെളിച്ചെണ്ണ, കടുക്, ഉഴുന്ന്, കായംപൊടി, കറിവേപ്പില, വറ്റൽ മുളക്.

തയ്യാറാക്കുന്ന വിധം

രണ്ട് മീഡിയം വലിപ്പത്തിലെ വെള്ളരിക്ക തൊലി കളഞ്ഞ് നന്നായി കഴുകി വൃത്തിയാക്കിയതിനുശേഷം കഷ്ണങ്ങളാക്കുക. ശേഷം ഇതിനൊപ്പം കാൽകപ്പ് നിലക്കടല വറുത്തത്, രണ്ട് വലിയ സ്‌പൂൺ കടലപ്പരിപ്പ്, രണ്ട് പച്ചമുളക്, മൂന്ന് അല്ലി വെളുത്തുള്ളി, അര ചെറിയ സ്‌പൂൺ ജീരകം, ഒരു വലിയ സ്‌പൂൺ നാരങ്ങാനീര്, ആവശ്യത്തിന് ഉപ്പ് എന്നിവ ചേർത്ത് അരച്ചെടുക്കണം. അടുത്തതായി വെളിച്ചെണ്ണ ചൂടാക്കിയതിനുശേഷം ഒരു ചെറിയ സ്‌പൂൺ കടുക്, ഒരു ചെറിയ സ്‌പൂൺ ഉഴുന്ന്, രണ്ട് തണ്ട് കറിവേപ്പില, രണ്ട് വറ്റൽമുളക് എന്നിവചേർത്ത് താളിക്കണം. ഇത് അരച്ചുവച്ച ചട്‌നിയുമായി ചേർത്തിളക്കി കാൽ സ്‌പൂൺ കായംപൊടി കൂടി ചേർക്കാം. കുക്കുമ്പർ ചട്‌നി റെഡിയായി.