കൈകൾ ബന്ധിച്ച് വേമ്പനാട്ടുകായൽ നീന്തിക്കടന്ന് ചരിത്രം കുറിക്കാൻ സൂര്യഗായത്രി; കൊച്ചുമിടുക്കിയുടെ ലക്ഷ്യം

വൈക്കം: കൈകൾ ബന്ധിച്ച് വേമ്പനാട്ടുകായൽ നീന്തിക്കടന്ന് ചരിത്രമിടാൻ സൂര്യഗായത്രി. ആലപ്പുഴ ജില്ലയിലെ ചേർത്തല കരിയിൽകൂമ്പേൽ കടവിൽ നിന്നും വൈക്കം ബീച്ച് വരെയുള്ള വേമ്പനാട്ട് കായലിന്റെ ഏ​റ്റവും ദൈർഘ്യമേറിയ പതിനൊന്ന് കിലോമീറ്റർ വരുന്ന ഭാഗത്താണ് നീന്തുക.

22ന് രാവിലെ 7.30ന് നീന്തൽ ആരംഭിക്കും. പരുത്തുമുടി നെടുവേലി മഠത്തിപറമ്പിൽ സുമിഷിന്റെയും രാഖിയുടെയും ഏക മകളാണ് സൂര്യഗായത്രി (കല്ലു ).വേൾഡ് വൈഡ് ബുക്ക് ഓഫ് റെക്കോർഡ്സ്, ഇന്ത്യൻ ബുക്ക് ഓഫ് റെക്കോർഡ്സ്, ഇന്റർനാഷണൽ ബുക്ക് ഓഫ് റെക്കോർഡ്സ് എന്നിവയിൽ ഇടം നേടുകയാണ് ലക്ഷ്യം.

വൈക്കം ലിസ്യൂസ് ഇംഗ്ലീഷ് സ്‌കൂളിലെ നാലാം ക്ലാസ് വിദ്യാർത്ഥിനിയാണ്. നീന്തൽ കോച്ചായ വില്യം പുരുഷോത്തമന്റെയും വി.എം രാജേഷിന്റെയും ശിക്ഷണത്തിലാണ് കല്ലു വേമ്പനാട് കായൽ നീന്താൻ ഒരുങ്ങുന്നത്. കാലാവസ്ഥ അനുകൂലമാണെങ്കിൽ ഒന്നര മണിക്കൂർ കൊണ്ട് നീന്തിക്കയറാൻ സാധിക്കുമെന്ന് പോഗ്രാം കോഡിനേ​റ്റർ ഷിഹാബ് കെ.സൈനു അറിയിച്ചു.