യൂബർ ഡ്രൈവർക്ക് നെഞ്ചുവേദന; വണ്ടിയോടിച്ച് താരമായി യുവതി

ന്യൂഡൽഹി: യാത്രയ്ക്കിടെ ഊബർ ഡ്രൈവർക്ക് ദേഹാസ്വാസ്ഥ്യം അനുഭവപ്പെട്ടതിനെ തുടർന്ന് ഡ്രൈംവിംഗ് ഏറ്റെടുത്ത യുവതി വൈറലായി. മേക്കപ്പ് ആർട്ടിസ്റ്റ് ഹണി പിപ്പലാണ് താരം.

ഗുരുഗ്രാമിൽ നിന്ന് ഡൽഹിയിലേക്ക് മകളും അമ്മയും മുത്തശ്ശിയുമായി യാത്ര ചെയ്യവേയുണ്ടായ അനുഭവം അവർ ഇൻസ്റ്റഗ്രാമിലൂടെ പങ്കുവയ്ക്കുകയായിരുന്നു. നെഞ്ചുവേദനയെ തുടർന്ന് ഡ്രൈവർക്ക് വാഹനം ഓടിക്കാൻ കഴിയാതായി. ഉടൻ താൻ ഡ്രൈവിംഗ് ഏറ്റെടുക്കുകയായിരുന്നു. എല്ലാ സ്ത്രീകളും ഡ്രൈവിംഗ് പഠിച്ചിരിക്കണമെന്ന ഉപദേശവും ഹണി നൽകി.

യാത്രയ്ക്കിടെ ആശ്വാസം തോന്നിയ ഊബർ ഡ്രൈവറോട് തന്റെ ഡ്രൈവിങ് സ്കിൽ എങ്ങനെയുണ്ടെന്ന് ഹണി തമാശരൂപേണ ചോദിക്കുന്നതും വിഡിയോയിൽ കാണാം.

വിഡിയോയ്ക്ക് താഴെ യുവതിയെ അഭിനന്ദിച്ച് ഒട്ടേറെപ്പെരെത്തി. മനുഷ്യത്വമാണ് പ്രധാനമെന്നും യുവതിയുടെ പ്രവൃത്തി പ്രശംസനീയമാണെന്നും പലരും കുറിച്ചു.