ദുൽഖർ വിളിച്ചിട്ടുണ്ട്, അതുകൊണ്ട് വരും; മകന്റെ വിവാഹം ക്ഷണിക്കാൻ പോയ മമ്മൂട്ടിക്ക്‌ പ്രമുഖ നടൻ നൽകിയ മറുപടി

ജീവിതത്തിൽ അഭിനയിക്കാനറിയാത്ത ആളാണ് തിലകനെന്ന് നടൻ ടിനി ടോം. ആരെയും പേടിക്കുകയോ ചൊൽപ്പടിയിൽ നിൽക്കുകയോ ചെയ്യുന്നയാളല്ല അദ്ദേഹമെന്നും ടിനി പറഞ്ഞു. ഒരു മാദ്ധ്യമത്തിന് നൽകിയ അഭിമുഖത്തിൽ സംസാരിക്കുകയായിരുന്നു അദ്ദേഹം.

മമ്മൂട്ടിയേക്കാൾ തനിക്കിഷ്ടം ദുൽഖറിനെയാണെന്ന് തിലകൻ പറഞ്ഞിട്ടുണ്ടെന്ന് ടിനി ടോം വ്യക്തമാക്കി. ' ദുബായിൽവച്ച് ടോയ്‌ലറ്റിൽ മൂത്രമൊഴിച്ചുകൊണ്ടിരുന്നപ്പോൾ മമ്മൂക്ക വന്നതിനെപ്പറ്റി പുള്ളി തന്നെ പറഞ്ഞിട്ടുണ്ട്. മോന്റെ കല്യാണമാണ് വരണമെന്ന് മമ്മൂക്ക പറഞ്ഞപ്പോൾ, ദുൽഖർ എന്നെ വിളിച്ച് അതുകൊണ്ട് വരാമെന്ന് അദ്ദേഹം പറഞ്ഞു. പുള്ളിയുടെ രീതി അതാണ്. അല്ലാതെ പാരവയ്‌പ്പൊന്നുമില്ല. ഡയറക്ട് മുഖത്തുനോക്കിപ്പറയും.'- ടിനി ടോം പറഞ്ഞു.

മോഹൻലാൽ ദേഷ്യപ്പെടുന്നത് ഒരു തവണമാത്രമാണ് കണ്ടതെന്ന് അദ്ദേഹം പറയുന്നു. 'ലാലേട്ടൻ ദേഷ്യപ്പെടുന്നത് ഞാൻ കണ്ടിട്ടില്ല. അതിനുവേണ്ടി ഞാൻ കാത്തിരിക്കുകയായിരുന്നു. ഒരു ദിവസം മാത്രം എന്തോ ഉണ്ടായി. ഭക്ഷണം കഴിക്കുന്നില്ല, അതുമാത്രമാണ് പുള്ളിയുടെ ദേഷ്യം. പുള്ളി കഴിച്ചില്ലെങ്കിൽ നമുക്ക് കഴിക്കാൻ പറ്റില്ലല്ലോ. സ്വയം ശിക്ഷിക്കുകയെന്നതാണ്. ഒരു ചായ കുടിക്കുമ്പോൾ പോലും നൂറ് ശതമാനം അത് എൻജോയ് ചെയ്യും.'- ടിനി ടോം വ്യക്തമാക്കി.

പണ്ട് ബസിൽവച്ച് തനിക്കും പക്രുവിനും നേരിടേണ്ടിവന്ന ദുരനുഭവവും അദ്ദേഹം തുറന്നുപറഞ്ഞു. 'ബസിൽ സീറ്റിൽ പക്രുവിനെയും ഇരുത്തി പോയി. തിരിച്ചുവന്ന് നോക്കിയപ്പോൾ ഇവനെ കാണാനില്ല. ഇവനെ എടുത്ത് മാറ്റി അവിടെ ആളിരിക്കുന്നു. ഞാൻ ഇടിയൊക്കെ ഉണ്ടാക്കി. പക്രു ഫ്രണ്ടിൽ നിൽക്കുന്നു. അപ്പോഴാണ് അവൻ പറഞ്ഞത് അവർ എന്നെ എടുത്തുമാറ്റിയെന്ന്. എന്നെങ്കിലും ഒരു വാഹനത്തിൽ പോകണമെന്ന ആഗ്രഹം അന്നാണ് ഉണ്ടായത്.'- ടിനി ടോം പറഞ്ഞു.