പള്ളിവാസലിൽ ഷി -ലോഡ്ജ്  : നിർമ്മാണം അവസാന ഘട്ടത്തിൽ 

അടിമാലി: പള്ളിവാസൽ ഗ്രാമപഞ്ചായത്തിന്റെ നേതൃത്വത്തിൽ ഷി ലോഡ്ജിന്റെ നിർമ്മാണജോലികൾ അവസാന ഘട്ടത്തിലെത്തി. ഒന്നേകാൽ കോടിയോളം രൂപ വകയിരുത്തിയാണ് പഞ്ചായത്ത് പദ്ധതി നടപ്പിലാക്കുന്നത്. ഏഴ് മുറികളും ഡോർമെറ്ററിയും അടങ്ങുന്നതാണ് ഷീ ലോഡ്ജ്. മൂന്നാറിലേക്കെത്തുന്ന വനിതകളായ വിനോദ സഞ്ചാരികൾക്ക് സുരക്ഷിത താമസത്തിന് അവസരമൊരുക്കാൻ ലക്ഷ്യമിട്ടാണ് പള്ളിവാസൽ ഗ്രാമപഞ്ചായത്ത് ഷീ -ലോഡ്ജ് നിർമ്മിക്കുന്നത്. രണ്ടാംമൈലിലാണ് ഷീലോഡ്ജിന്റെ നിർമ്മാണ പ്രവർത്തനങ്ങൾ പുരോഗമിക്കുന്നത്. വനിതകൾക്ക് സുരക്ഷിത താമസത്തിന് അവസരമൊരുക്കുകയെന്നതിനൊപ്പം തദ്ദേശിയരായ വനിതകൾക്ക് തൊഴിൽ അവസരം സൃഷ്ടിക്കുകയെന്ന ലക്ഷ്യവും പദ്ധതിക്കുണ്ട്. ഏഴ് മുറികളും ഡോർമെറ്ററിയും അടങ്ങുന്നതാണ് ഷീ -ലോഡ്ജ്. ഡോർമെറ്ററിയിൽ മാത്രം മുപ്പതിലധികം വനിതകൾക്ക് താമസ സൗകര്യമൊരുക്കും.
ഏറെ വൈകാതെ പദ്ധതിയുടെ നിർമ്മാണ പൂർത്തീകരണം സാദ്ധ്യമാകുമെന്ന് ഗ്രാമപഞ്ചായത്ത് പ്രസിഡന്റ് വി.ജി പ്രതീഷ്‌കുമാർ പറഞ്ഞു. ഷീ ലോഡ്ജ് പദ്ധതി മൂന്നാറിന്റെ വിനോദസഞ്ചാരമേഖലക്ക് കൂടുതൽ കരുത്ത് പകരുമെന്നാണ് പ്രതീക്ഷ. 2022 -23 വർഷത്തിലായിരുന്നു പള്ളിവാസൽ പഞ്ചായത്ത് പദ്ധതിക്ക് തുടക്കംകുറിച്ചത്. ഡോർമെറ്ററിയിൽ മാത്രം മുപ്പതിലധികം ആളുകൾക്കു താമസ സൗകര്യമുണ്ടാകും.