"പണം കിട്ടാനോ മറ്റ് കാര്യങ്ങൾക്ക് വേണ്ടിയോ ഇതുവരെ തുണി അഴിച്ചിട്ടില്ല"

നിരവധി സിനിമകളിലൂടെയും സീരിയലുകളിലൂടെയും മലയാളികളുടെ പ്രിയങ്കരിയായ നടിയാണ് സോന നായർ. സോഷ്യൽ മീഡിയയിലൂടെ വരുന്ന നെഗറ്റീവ് കമന്റുകൾ ശ്രദ്ധിക്കാറില്ലെന്ന് വ്യക്തമാക്കിയിരിക്കുകയാണ് നടിയിപ്പോൾ. ഒരു മാദ്ധ്യമത്തിന് നൽകിയ അഭിമുഖത്തിൽ സംസാരിക്കുകയായിരുന്നു സോന നായർ.

'എല്ലാ കമന്റുകളും പോസിറ്റീവായിട്ടങ്ങ് എടുക്കും. നമ്മൾ ചെയ്യുന്ന പ്രവൃത്തിയാണ് മുഖ്യം. കമന്റുകളല്ല. നമ്മളെക്കുറിച്ച് എല്ലാവരും ഒരുപോലെ സംസാരിക്കണമെന്ന് പറയാൻ പറ്റില്ല. കമന്റുകൾ എഴുതുന്നവർ എഴുതിക്കൊണ്ടിരിക്കും. അവരുടെ കുറച്ച് അക്ഷരങ്ങൾ നന്നാകും. അതിനപ്പുറം ഇതൊന്നും വലിയ സംഭവമായെടുക്കുന്നില്ല. അതെല്ലാം അതിന്റെ വഴിക്ക് പോകും.

പണം കിട്ടാനോ മറ്റ് സംഭവങ്ങൾക്കോ വേണ്ടി തുണി ഇതുവരെ അഴിച്ചിട്ടില്ല. അങ്ങനെയുള്ളൊരു കാര്യം എനിക്കിതുവരെ ഉണ്ടായിട്ടില്ല. ഉണ്ടാവുകയുമില്ല. അതുകൊണ്ടാണ് 35 വർഷമായി ഞാൻ ഇവിടെ നിൽക്കുന്നത്.

ഒരു കല്യാണത്തിന് പോയി. ബാക്കിൽ നിന്നാണ് ചിലർ ഷോട്ട് എടുക്കുന്നത്. എന്ത് നിർവൃതി കിട്ടുമെന്ന് എനിക്കറിയില്ല. ബാക്ക് ഷോട്ടുകൾ മാത്രമെടുത്ത് സോഷ്യൽ മീഡിയയിൽ കാണിക്കും, പിന്നെ അതുമായി ബന്ധപ്പെട്ടുള്ള കമന്റുകളായിരിക്കും. ഇവർക്കൊക്കെ വേറെ ചില സൈറ്റുകളിൽ പോയാൽ പോരേ. ഇതൊന്നുമല്ല അവിടെ കാണുന്നത്. ഇതിന്റെയൊക്കെ ഇരട്ടി ബാക്ക് ഷോട്ടുകളും മറ്റുമായിരിക്കും ആ സൈറ്റിലുണ്ടാകുക. അതൊന്നും പോര. എല്ലാവർക്കും സോന നായരുടെ ബാക്ക് മതി. ക്യാമറയിരിക്കുന്നത് പോലും അറിയില്ല. എത്ര പേരുടെ പ്രൈവസിയാണ് പോകുന്നത്. ഭർത്താവിന്റെ കൂടെ എവിടെയെങ്കിലും പോയാലും ഏതോ ഒരു താടിക്കാരന്റെ കൂടെപ്പോയെന്ന് പറയും.'- സോന നായർ പറഞ്ഞു.