'ഈ മുറിവുണങ്ങാൻ എത്ര നാൾ എടുക്കുമെന്ന് അറിയില്ല, അവന്റെ യാത്രകളിൽ കൂടെ ഉണ്ടായിരുന്നവരാണ് മരണപ്പെട്ടവർ'

അഹമ്മദാബാദ് വിമാനാപകടത്തെക്കുറിച്ച് നടി സീമ ജി നായർ സോഷ്യൽ മീഡിയയിൽ പങ്കുവെച്ച കുറിപ്പ് ശ്രദ്ധേയമാകുന്നു. അപകടത്തെക്കുറിച്ച് അറിഞ്ഞപ്പോൾ അവർ ആദ്യം വിളിച്ചത് എയർ ഇന്ത്യയെയാണ്. കൂടപ്പിറപ്പിനെ പോലെ സ്നേഹിക്കുന്ന സുഹൃത്ത് വിഷ്ണുവിനെ അന്വേഷിച്ചായിരുന്നു താരത്തിന്റെ വിളി. എയർ ഇന്ത്യയിൽ സൂപ്പർ വൈസറായി ‌ ജോലി ചെയ്യുകയാണ് വിഷ്ണു. അവന്റെ ശബ്ദം കേൾക്കുന്നതുവരെ സമാധാനം ഉണ്ടായില്ലെന്നും സീമ ഫേസ്ബുക്ക് പോസ്റ്റിലൂടെ കുറിച്ചു.

സീമ ജി നായരുടെ കുറിപ്പ് വായിക്കാം ;

'ഇന്നലെ ഉച്ചമുതൽ ആകെ വല്ലാത്ത അവസ്ഥയിൽ ആയിരുന്നു. വിമാന ദുരന്തത്തിന്റെ ആഘാതം വിട്ടൊഴിയുന്നില്ല. ഇന്നുവരെ കാണാത്ത ,കേൾക്കാത്ത നിരവധി ആൾക്കാരുടെ ജീവിതം ഒരു സെക്കൻഡിൽ ഇല്ലാതാവുന്നു എന്നറിയുന്ന ആ നിമിഷം. അവർ ആരുമല്ലെങ്കിലും നമ്മുടെ ആരൊക്കെയോ ആണെന്ന ചിന്ത ആയിരുന്നു മനസുനിറയെ. ഇതെന്റെ കൂടപ്പിറപ്പിനെ പോലെ ഞാൻ സ്നേഹിക്കുന്ന വിഷ്ണു. പത്തനാപുരം സ്വദേശി. അവൻ എയർ ഇൻഡ്യയിൽ സൂപ്പർ വൈസറാണ്. ഇന്നലെ ഷൂട്ടിലായിരുന്നു ഞാൻ , അപകടം അറിഞ്ഞയുടൻ നെഞ്ചിൽ ഒരു ആളൽ ആയിരുന്നു. പെട്ടെന്ന് അവനെ വിളിച്ചു, അങ്ങേ തലക്കൽ വിഷ്ണുവിന്റെ സ്വരം കേൾക്കുന്നതുവരെ സമാധാനം ഉണ്ടായില്ല. സ്വരം കേട്ടെങ്കിലും കരച്ചിലായിരുന്നു.

അവന്റെ യാത്രകളിൽ കൂടെ ഉണ്ടായിരുന്നവർ ആണ്‌ മരണപ്പെട്ട ജീവനക്കാരും, പൈലറ്റ്സും. അവന്റെ കല്യാണത്തിന് വന്നവരായിരുന്നു പലരും. എങ്ങനെ സമാധാനിപ്പിക്കണമെന്നറിയില്ലായിരുന്നു. ഇന്ന് രാവിലെ വീണ്ടും ലണ്ടനിലേക്കുള്ള ഫ്ലൈറ്റിൽ അവനു ജോലിക്കു പോകണമായിരുന്നു. റീ ഷെഡ്യുൾ ചെയ്തു ഇന്ന് രാത്രീ ഡൽഹിയിൽ നിന്നും ലണ്ടനിലേക്ക് പോകും. ഈ മുറിവുണങ്ങാൻ എത്ര നാൾ എടുക്കും എന്നറിയില്ല. ഇപ്പോൾ വിളിക്കുമ്പോഴും അവന്റെ സ്വരം വല്ലാണ്ടിടറിയിരുന്നു. പ്രതീക്ഷകളും, സ്വപ്നങ്ങളും ബാക്കി വച്ച് ഒരു നിമിഷം കൊണ്ട് എല്ലാം പൊലിഞ്ഞു തീരുമ്പോൾ, ഈശ്വര നിന്നോട് ഒന്നേ അപേക്ഷിക്കാനുള്ളു ഇത്രയും ക്രൂരനാവല്ലേ നീ'. സീമ ജി നായർ കുറിച്ചു.