എല്ലാ സോഷ്യൽ മീഡിയ അക്കൗണ്ടുകൾക്കും ഒരേ പാസ്‌വേഡാണോ?​ ഉടൻ മാറ്റിക്കോളൂ,​ ഇല്ലെങ്കിൽ പണി പിന്നാലെ വരുന്നുണ്ട്

ന്യൂഡൽഹി: 1600 കോടിയിലധികം ഗൂഗിൾ ഉപയോക്താക്കളുടെ വ്യക്തിഗത വിവരങ്ങൾ ചോർന്നെന്ന് സൈബർ സുരക്ഷാ ഉദ്യോഗസ്ഥർ. ഈമെയിൽ ഐഡികളും പാസ്‌വേഡുകളുമാണ് ചോർന്നിരിക്കുന്നതെന്നാണ് വിവരം. സ്മാർട്ട്‌ഫോൺ, ലാപ്‌ടോപ്പ്, സോഷ്യൽ മീഡിയകൾ എന്നിവ ഉപയോഗിക്കുന്നവർ അതീവ ജാഗ്രത പുലർത്തണമെന്നാണ് മുന്നറിയിപ്പ്. ഇത് ചരിത്രത്തിലെ ഏ​റ്റവും വലിയ ഡാ​റ്റാ ചോർച്ചയാണെന്നും ഗൂഗിൾ, ഫേസ്ബുക്ക്, ആപ്പിൾ, ടെലിഗ്രാം തുടങ്ങിയ പ്ലാ​റ്റ്‌ഫോമുകളെ നേരിട്ട് ബാധിക്കുമെന്നും വിദഗ്ധർ അറിയിച്ചിട്ടുണ്ട്.

ഈമെയിൽ ഉപയോക്താക്കളുടെ വിവരങ്ങൾ ഒരു സെർവറിൽ നിന്നുമാണ് കണ്ടെത്തിയതെന്നും ആർക്കുവേണമെങ്കിലും എളുപ്പത്തിൽ വിവരങ്ങൾ ചോർത്തിയെടുക്കാമെന്നും അധികൃതർ പറയുന്നു. ഇത് സർക്കാർ വെബ്‌സൈ​റ്റുകൾ, ബിസിനസ് ഈമെയിലുകൾ, ജനപ്രിയ സോഷ്യൽ മീഡിയ പ്ലാ​റ്റ്‌ഫോമുകൾ എന്നിവയെ അപകടസാദ്ധ്യതയിലാക്കിയിരിക്കുകയാണെന്ന് വിദഗ്ധർ മുന്നറിയിപ്പ് നൽകിയിരിക്കുകയാണ്. പുറത്തുവന്ന വിവരങ്ങൾ അനുസരിച്ച് സെർവറിൽ നിന്ന് ശേഖരിച്ച ഡാ​റ്റകളിൽ ഉപയോക്താക്കളുടെ പഴയതും പുതിയതുമായി പാസ്‌വേഡുകൾ കണ്ടെത്തിയിട്ടുണ്ട്.

350 കോടിയിലധികം വിവരങ്ങൾ അടങ്ങിയ 30ൽ അധികം ഡാ​റ്റാ ബേസുകൾ പരിശോധിച്ചിട്ടുണ്ടെന്നും അധികൃതർ അറിയിച്ചു. അത് അടുത്തിടെ അപ്‌ഡേ​റ്റ് ചെയ്ത ഈമെയിൽ പാസ്‌വേഡുകളെയും ബാധിച്ചേക്കാമെന്നും മുന്നറിയിപ്പുണ്ട്. ഡാ​റ്റാ ചോർച്ചയുടെ വിവരങ്ങൾ പുറത്തുവന്നതിനുപിന്നാലെ ഉപയോക്താക്കൾക്ക് ഗൂഗിൾ ഔദ്യോഗികമായി മുന്നറിയിപ്പും നൽകിയിട്ടുണ്ട്. വ്യത്യസ്ത സോഷ്യൽ മീഡിയ അക്കൗണ്ടുകൾക്കായി ഒരേ പാസ്‌വേഡ് ഉപയോഗിക്കുന്നവർക്കും ഗൂഗിൾ മുന്നറിയിപ്പ് നൽകി. ഷിഷിംഗ്, സൈബർ തട്ടിപ്പുകൾ തുടങ്ങിയവയോട് ജാഗ്രത പുലർത്തണമെന്നും ഗൂഗിൾ അറിയിച്ചു.

പ്രധാന നിർദ്ദേശങ്ങൾ

• ഉപയോക്താക്കൾ ഉടനടി തന്നെ ഈമെയിൽ പാസ്‌വേഡുകൾ മാ​റ്റുക.
• ശക്തമായ പാസ്‌വേഡുകൾ ക്രമീകരിക്കുക.
• ഫിഷിംഗ്, പാസ്‌വേഡ് അടിസ്ഥാനമാക്കിയുളള ആക്രമണങ്ങൾ തടയുന്നതിനായി രൂപകൽപ്പന ചെയ്തിരിക്കുന്ന ഒരു പാസ്‌കീയും സജീവമാക്കുക.
• സംശയാസ്പദമായതോ അജ്ഞാതമായതോ ആയ ലിങ്കുകളിൽ പ്രവേശിക്കുന്നത് ഒഴിവാക്കുക.
• ഈമെയിലുകൾ വഴിയോ സ്ഥിരീകരിക്കാത്ത സന്ദേശങ്ങൾ വഴിയോ ഒരിക്കലും വ്യക്തിഗത വിവരങ്ങൾ പങ്കുവയ്ക്കരുത്.