31 മലയാളികള്‍ കൂടി ഇസ്രായേല്‍ വിട്ട് തിരിച്ചെത്തി, നാട്ടിലേക്കുള്ള മടക്കം വ്യോമസേന വിമാനത്തില്‍

ന്യൂഡല്‍ഹി : ഓപ്പറേഷന്‍ സിന്ധുവിന്റെ ഭാഗമായി ഇസ്രായേലില്‍ നിന്ന് ഇന്ത്യന്‍ വ്യോമസേന 18 മലയാളികളെക്കൂടി ഡല്‍ഹിയില്‍ എത്തിച്ചു. പാലം എയര്‍പോര്‍ട്ടില്‍ ഇന്ന് ( ജൂണ്‍ 24) ഉച്ചയ്ക്ക് 12 ന് എത്തിയ രണ്ടാമത്തെ സി17 വിമാനത്തില്‍ ആകെ 266 ഇന്ത്യാക്കാരുണ്ടായിരുന്നു. ഇന്ന് ഇസ്രായേലില്‍ നിന്ന് ഇന്ത്യയിലെത്തിയ മലയാളികളുടെ എണ്ണം ഇതോടെ 31 ആയി. ഇന്ന് രാവിലെ 8 മണിക്കയ്ക്ക് ഇന്ദിരാ ഗാന്ധി അന്താരാഷ്ട്ര വിമാനത്താവളത്തില്‍ എത്തിയ വിമാനത്തില്‍ ഇസ്രായേലില്‍ നിന്നുള്ള ഒരാളും രാവിലെ 8:45 നു പാലം വിമാനത്താവളത്തില്‍ 12 പേരും എത്തിയിരുന്നു.

തൃശൂര്‍ സ്വദേശികളായ ജോയല്‍ ജയ്‌സണ്‍, ഡെന്നീസ് ജോസ് , മനു മന്നാട്ടില്‍, ഫ്‌ലാവിയ പഴയാറ്റില്‍ ,
മലപ്പുറം സ്വദേശികളായ ശരത് ശങ്കര്‍, ഐശ്വര്യ പദ്മ ദാസ്, ശിശിര മാമ്പ്രംകുന്നത്ത്, എറണാകുളം സ്വദേശികളായ ലക്മിപ്രിയ, അശ്വതി അനില്‍ കുമാര്‍, ജസ്റ്റിന്‍ ജോര്‍ജ്, രാഘവേന്ദ്ര ചൗധരി ,
ഏലിയാമ്മ മലയപ്പള്ളില്‍ തോമസ് (മാനന്തവാടി)
സുജിത് രാജന്‍ (കൊല്ലം), നിള നന്ദ (പാലക്കാട്),
തിരുവനന്തപുരം സ്വദേശിയായ അര്‍ജുന്‍ ചന്ദ്രമോഹനന്‍ ഭാര്യ കൃഷ്ണപ്രിയ,
പി.ആര്‍.രാജേഷ് (പത്തനംതിട്ട)
അക്ഷയ് പുറവങ്കര (കണ്ണൂര്‍) എന്നിവര്‍ മലയാളി സംഘത്തില്‍ ഉള്‍പ്പെടുന്നു.

കൊച്ചി , കണ്ണൂര്‍, തിരുവന്തപുരം, കോഴിക്കോട് എന്നീ വിമാനത്താവളങ്ങളിലൂടെയാണ് ഇവരെ നാട്ടിലെത്തിക്കുക.

കേന്ദ്ര പാര്‍ലമെന്ററികാര്യ സഹമന്ത്രി എല്‍. മുരുകന്‍, കേരള ഹൗസ് അഡീഷണല്‍ റസിഡന്റ് കമീഷണര്‍ ചേതന്‍ കുമാര്‍ മീണ, നോര്‍ക്ക ഡവലപ്പ്‌മെന്റ് ഓഫീസര്‍ ജെ. ഷാജി മോന്‍ എന്നിവരുടെ നേതൃത്വത്തിലുള്ള സംഘം നാട്ടിലെത്തിയവരെ സ്വീകരിച്ചു.