കാർ സ്​ത്രീകൾക്ക് നേരെ പാഞ്ഞുകയറി ഒരാൾ മരിച്ചു

ആലപ്പുഴ: അമിതവേഗതയി​​​ലെത്തിയ കാർ നിയന്ത്രണംവിട്ട്​ കാൽനടയാത്രക്കാരായ സ്​ത്രീകൾക്കുനേരെ പാഞ്ഞുകയറി ഒരാൾ മരിച്ചു. ഒപ്പമുണ്ടായിരുന്ന സ്ത്രീക്ക്​ ഗുരുതരപരിക്ക്​. ആലപ്പുഴ കളപ്പുര കിഴക്കേമംഗലം വീട്ടിൽ ഓട്ടോഡ്രൈവർ രാജീവിന്റെ ഭാര്യ സുധക്ഷിണയാണ്​ (55) മരിച്ചത്​. ഗുരുതര പരി​ക്കേറ്റ ആലപ്പുഴ കളപ്പുര പുളിക്കൽ വീട്ടിൽ പരേതനായ വിനോദിന്റെ ഭാര്യയും ചങ്ങനാശ്ശേരി പായിപ്പാട്​ പഞ്ചായത്തിലെ പ്യൂണുമായ ബിന്ദുവിനെ (50) എറണാകുളത്തെ സ്വകാര്യ ആശുപത്രിയിൽ പ്രവേശിപ്പിച്ചു.

ഇന്നലെ രാവിലെ 8.40ന്​ ആലപ്പുഴ ബൈപാസ്​ റോഡിൽ കൊമ്മാടി പഴയ ​​​ടോൾഗേറ്റിന്​ തെക്കുഭാഗത്തായിരുന്നു അപകടം. നെടുമ്പാശ്ശേരി വിമാനത്താവളത്തിൽനിന്ന്​ കായംകുളം ഭാഗത്തേക്ക്​ പോയ കാറാണ്​ അപകടമുണ്ടാക്കിയത്​. വിദേശത്തുനിന്ന്​ അവധിക്ക്​ നാട്ടിലെത്തിയ സ്ത്രീയും കായംകുളം സ്വദേശിയായ ഡ്രൈവറുമാണ്​ കാറിലുണ്ടായിരുന്നത്​. അപകടമുണ്ടായതിന്​ പിന്നാലെ നമ്പർ പ്ലേറ്റ്​ അഴിച്ചുമാറ്റിയതായും അറിയുന്നു.

ഗോകുൽ കയർ കമ്പനിയിലെ ജീവനക്കാരിയായ സുധക്ഷിണ ജോലിക്കായി പോകുമ്പോഴാണ്​ ദിശതെറ്റി അമിതവേഗതയിലെത്തിയ കാർ പാഞ്ഞുകയറിയത്​. ബിന്ദുവും പായിപ്പാട്​ പഞ്ചായത്തി​ലേക്ക്​ ജോലിക്കുപോകുന്നതിനായി​ ഇറങ്ങിയതായിരുന്നു. ഗുരുതര പരിക്കേറ്റ ഇരുവരെയും സമീപത്തെ സ്വകാര്യ ആശുപത്രിയിൽ എത്തിച്ചെങ്കിലും സുധക്ഷിണയുടെ ജീവൻ രക്ഷിക്കാനായില്ല. മൃതദേഹം സംസ്കരിച്ചു. മക്കൾ: രാഹുൽ, പ്രിയങ്ക. മരുമക്കൾ: അർജുൻ, അർച്ചന.