ഡി.സി ബുക്‌സിന് എഫ്.ഐ.പിയുടെ പതിമ്മൂന്ന് പുരസ്‌കാരങ്ങൾ

ന്യൂഡൽഹി: ഫെഡറേഷൻ ഒഫ് ഇന്ത്യൻ പബ്ലിഷേഴ്സിന്റെ 2019ലെ മികച്ച പുസ്തക നിർമ്മിതിക്കും രൂപകല്പനയ്ക്കുമുള്ള 13 ദേശീയ പുരസ്‌കാരങ്ങൾ ഡി.സി ബുക്‌സിന് ലഭിച്ചു. ജനറൽ ബുക്‌സ് (പ്രാദേശികഭാഷ) വിഭാഗത്തിൽ ദേവ്ദത്ത് പട്നായിക് രചിച്ച ജയമഹാഭാരതം, കുട്ടികളുടെ പുസ്തകവിഭാഗത്തിൽ (പ്രാദേശികഭാഷ) അഷിത രചിച്ച കൊറ്റിയും കുറുക്കനും,​ സച്ചിദാനന്ദന്റെ പശുവും പുലിയും,​ കുട്ടികളുടെ വിഭാഗത്തിൽ (ഇംഗ്ലീഷ്) വിക്രമാദിത്യൻ ആൻഡ്‌ വേതാളം, വെസ്റ്റിൻ വർഗീസിന്റെ ദ ഷാഡോ ഒഫ് ദ സ്റ്റീം എൻജിൻ എന്നിവ പുരസ്‌കാരം നേടി.

ടെക്സ്റ്റ് ബുക്സ് ആൻഡ് റഫറൻസ് ബുക്സ് വിഭാഗത്തിൽ (പ്രാദേശികഭാഷ) ഉപിന്ദർ സിംഗ് രചിച്ച പ്രാചീന-പൂർവ്വ-മദ്ധ്യകാല ഇന്ത്യാചരിത്രം, ശാസ്ത്ര- സാങ്കേതിക-മെഡിക്കൽ ബുക്‌സ് വിഭാഗത്തിൽ (പ്രാദേശികഭാഷ) പ്രണയ് ലാലിന്റെ ഇൻഡിക, കവർ ജാക്കറ്റ് (പ്രാദേശികഭാഷ) വിഭാഗത്തിൽ രൂപിക ചൗള രചിച്ച രാജാരവിവർമ്മ- കൊളോണിയൽ ഇന്ത്യയുടെ ചിത്രകാരൻ, ഡിജിറ്റൽ പ്രിന്റിംഗ് വിഭാഗത്തിൽ സോൾമാസ് കമുറാന്റെ കിരാസെ, മാസികവിഭാഗത്തിൽ ഡി.സി ബുക്സ് പ്രസിദ്ധീകരിക്കുന്ന ബിസിനസ് മാസിക എമർജിംഗ് കേരള, ആർ‌ട്ട് ബുക്സ്/കോഫി ടേബിൾ ബുക്‌സ് (പ്രാദേശികഭാഷ) വിഭാഗത്തിൽ രൂപിക ചൗള രചിച്ച രാജാരവിവർമ്മ-കൊളോണിയൽ ഇന്ത്യയുടെ ചിത്രകാരൻ, ടെക്സ്റ്റ് ബുക്സ് & റഫറൻസ് ബുക്സ് വിഭാഗത്തിൽ (പ്രാദേശികഭാഷ) ഒരുവട്ടംകൂടി: എന്റെ പാഠപുസ്‌തകങ്ങൾ എന്നിവയും പുരസ്‌കാരം സ്വന്തമാക്കി.

ശാസ്ത്ര- സാങ്കേതിക-മെഡിക്കൽ ബുക്‌സ് വിഭാഗത്തിൽ (പ്രാദേശികഭാഷ) സുരേഷ് മണ്ണാറശാലയുടെ 'കണ്ടൽക്കാടുകൾ" എന്ന രചനയും പുരസ്‌കാരത്തിന് അർഹമായി. 28ന് ഡൽഹിയിൽ പുരസ്‌കാരങ്ങൾ വിതരണം ചെയ്യും.