സെക്രട്ടേറിയറ്റിനുമുന്നിൽ ആശമാരെ കാണാൻ രാഹുൽ മാങ്കൂട്ടത്തിൽ എത്തി, സ്നേഹ സ്വീകരണം

തിരുവനന്തപുരം: സെക്രട്ടറിയേറ്റിനുമുന്നിലെ ആശമാരുടെ സമരപ്പന്തൽ സന്ദർശിച്ച് പാലക്കാട് എംഎൽഎ രാഹുൽ മാങ്കൂട്ടത്തിൽ. ഇന്നുരാവിലെ പതിനൊന്നുമണിയോടെയാണ് സമരം ചെയ്യുന്ന ആശമാരെ കാണാൻ രാഹുൽ എത്തിയത്. കൈകൊടുത്തും സ്നേഹത്തോടെ പുറത്തുതട്ടിയുമാണ് എംഎൽഎയെ ആശമാർ വരവേറ്റത്. ആശമാരോട് രാഹുൽ വിശേഷങ്ങൾ ചോദിച്ചറിയുകയും ചെയ്തു. ഒറ്റയ്ക്കാണ് രാഹുൽ സമരപ്പന്തലിൽ എത്തിയത്. നേതാക്കളോ, യുഡിഎഫ് പ്രവർത്തകരോ ഒപ്പമുണ്ടായിരുന്നില്ല എന്നാണ് റിപ്പോർട്ട്. നിയമസഭയുടെ പ്രത്യേക സമ്മേളനം നടക്കുന്നതിനാൽ രാഹുൽ തലസ്ഥാനത്തുണ്ടായിരുന്നു. പ്രതിപക്ഷ നേതാവുൾപ്പെടെയുള്ള കൂടുതൽ യുഡിഎഫ് നേതാക്കൾ സമരപ്പന്തലിൽ എത്തിയേക്കും എന്നാണ് അറിയുന്നത്.

266 ദിവസമായി ആശാവർക്കർമാർ സെക്രട്ടേറിയറ്റിന് മുന്നിൽനടത്തിവന്ന രാപ്പകൽ സമരത്തിന് ഇന്ന് തിരശീല വീഴുകയാണ്. സമര പ്രഖ്യാപന റാലിയോടെയാണ് അവസാനിപ്പിക്കുന്നത്. സമരം ജില്ലകളിലേക്ക് വ്യാപിപ്പിക്കാനാണ് സമര സമിതിയുടെ തീരുമാനം. സമരത്തിന്റെ ഒന്നാം വാർഷിക ദിനമായ

ഫെബ്രുവരി 10 ന് സെക്രട്ടേറിയറ്റിലേക്ക് മഹാറാലിയും സംഘടിപ്പിക്കും. 21000 രൂപ ഓണറേറിയം, വിരമിക്കൽ ആനുകൂല്യമായി അഞ്ചുലക്ഷം രൂപ തുടങ്ങിയ ആവശ്യങ്ങളുന്നയിച്ചാണ് സമരം തുടരുന്നത്.

അഞ്ച് പൈസ പോലും ഓണറേറിയം വർദ്ധിപ്പിക്കില്ലെന്നു പറഞ്ഞ സർക്കാർ 1000 രൂപ ഓണറേറിയം വർദ്ധിപ്പിച്ചതിനാലാണ് രാപ്പകൽ സമരം അവസാനിപ്പിക്കുന്നതെന്ന് കേരള ആശാ ഹെൽത്ത് വർക്കേഴ്സ് അസോസിയേഷൻ ജനറൽ സെക്രട്ടറി എം.എ. ബിന്ദു കേരളകൗമുദിയോട് പറഞ്ഞു. ഓണറേറിയം വർദ്ധിപ്പിക്കേണ്ടത് കേന്ദ്ര സർക്കാരാണെന്ന് നിലപാടെടുത്ത സംസ്ഥാന സർക്കാർ ഒടുവിൽ സമരക്കാരുടെ മുന്നിൽ മുട്ടുമടക്കിയെന്നും അവർ വ്യക്തമാക്കി.ഈ വർഷം ഫെബ്രുവരി 10 നാണ് ഓണറേറിയം വർദ്ധന ഉൾപ്പെടെയുള്ള ആവശ്യങ്ങളുമായി ആശമാർ സെക്രട്ടേറിയറ്റിന് മുന്നിൽ രാപ്പകൽ സമരം ആരംഭിച്ചത്.

സമരത്തെ തുടർന്ന് വിവിധ തദ്ദേശ സ്ഥാപനങ്ങൾ ആശമാർക്ക് ആനുകൂല്യങ്ങൾ പ്രഖ്യാപിച്ചെങ്കിലും സർക്കാർ തടഞ്ഞതായും ആശമാർ ആരോപിക്കുന്നു. ഈ സാഹചര്യത്തിൽ തദ്ദേശ തിരഞ്ഞെടുപ്പിൽ സമരം രാഷ്ട്രീയമായി ഉപയോഗിക്കാനാണ് തീരുമാനം. ജോലിയുടെ ഭാഗമായ ഭവന സന്ദർശനത്തിനൊപ്പം പ്രാദേശിക തലങ്ങളിൽ വീടുകൾ കയറി സർക്കാരിനെതിരെ പ്രചാരണം നടത്താനും തീരുമാനിച്ചിട്ടുണ്ട്.