'പുലികളി സംഘങ്ങൾക്ക്  ധനസഹായം  വെെകാൻ  കാരണം സംസ്ഥാന  ടൂറിസം  വകുപ്പ്'; രൂക്ഷവിമർശനവുമായി  സുരേഷ്  ഗോപി

തൃശൂർ: സംസ്ഥാന ടൂറിസം വകുപ്പിനെതിരെ രൂക്ഷവിമർശനവുമായി കേന്ദ്രമന്ത്രി സുരേഷ് ഗോപി. പുലികളി സംഘങ്ങൾക്ക് ധനസഹായം വെെകാൻ കാരണം ടൂറിസം വകുപ്പിന്റെ അനാസ്ഥയാണെന്നാണ് സുരേഷ് ഗോപി ആരോപിക്കുന്നത്. പുലികളി സംഘങ്ങൾക്ക് പ്രഖ്യാപിച്ച ധനസഹായം ഇനിയും ലഭിക്കാത്തതിൽ വിവാദങ്ങൾ ഉയരുന്നതിനിടെയാണ് മന്ത്രിയുടെ പ്രതികരണം.

പുലികളി സംഘങ്ങളുടെ ചെലവ് കണക്ക് സംസ്ഥാന ടൂറിസം വകുപ്പ് നൽകിയില്ല. ഓരോ പുലികളി സംഘത്തിനും മുന്നുലക്ഷം രൂപയായിരുന്നു കേന്ദ്ര ധനസഹായം. സ്വന്തം ഇടപെടലിലൂടെയാണ് കേന്ദ്രത്തിൽ നിന്ന് ധനസഹായം ലഭിച്ചതെന്നും സുരേഷ് ഗോപി വിശദീകരിച്ചു.

അതേസമയം,​ കേരളത്തിൽ എവിടെയെങ്കിലും എയിംസിന് തറക്കല്ലിടാതെ ‌ജനങ്ങൾക്കുമുന്നിൽ വോട്ട് അഭ്യർത്ഥിച്ച് വരില്ലെന്ന് സുരേഷ്‌ ഗോപി അടുത്തിടെ പറഞ്ഞിരുന്നു. പോരാളിയെ പോലെ പൊരുതുമെന്നും അദ്ദേഹം അന്ന് വ്യക്തമാക്കി. ഭൂമിശാസ്ത്രപരമായി ഇടുക്കിയിൽ എയിംസ് പൂർത്തിയാക്കാൻ സാധിക്കില്ലെന്നും സുരേഷ് ഗോപി പറഞ്ഞു. താൻ തൃശൂർക്കാരുടെ എംപി മാത്രമല്ലെന്നും കേരളത്തിന്റെ മുഴുവൻ എംപിയാണെന്നും തൃശൂര്‍ കോര്‍പ്പറേഷന്‍ സ്റ്റേഡിയത്തിലെ എസ് ജി കോഫി ടൈംസ് പരിപാടിയിൽ സംസാരിക്കുന്നതിനിടെ അദ്ദേഹം പറഞ്ഞു.

'കേരളത്തിൽ എവിടെയെങ്കിലും എയിംസിന് തറക്കല്ലിടാതെ ഞാൻ നിങ്ങളുടെ മുൻപിൽ വോട്ട് അഭ്യർത്ഥിച്ച് വരില്ല. പ്രധാനമന്ത്രി നരേന്ദ്രമോദിയുടെ ആപ്തവാക്യം സബ്കാ സാധ് സബ്കാ വികാസ് എന്നാണ്. കഴിഞ്ഞ മൂന്ന് വർഷമായി സബ്കാ പ്രയാസ് സബ്കാ വിശ്വാസ് എന്നാണ്. എല്ലാവരുടെയും പ്രയത്നം ഇതിലുണ്ടായിരിക്കണം. എല്ലാവർക്കുംവേണ്ടിയായിരിക്കണം വികസനം. എയിംസിന്റെ കാര്യത്തിൽ സംസ്ഥാനത്തിന് മുഴുവൻ നേട്ടമാകുന്ന തരത്തിലായിരിക്കും തറക്കല്ലിടൽ ചടങ്ങ് നടക്കുക.

ഇടുക്കിയും ആലപ്പുഴയുമാണ് ഏ​റ്റവും കൂടുതൽ ദുരിതത്തിലായിരിക്കുന്നത്. ഇതുവരെയായിട്ടും അവർ ദുരിതത്തിൽ നിന്ന് കര കയറിയിട്ടില്ല. ഭൂമിശാസ്ത്രപരമായി ഇടുക്കിയിൽ എയിംസ് വരുന്നത് സാദ്ധ്യമല്ല. ഞാൻ അന്നുമുതൽക്കേ എയിംസിനെക്കുറിച്ച് പറയുന്നതാണ്. വാക്കുമാ​റ്റിയിട്ടില്ല. ഞാൻ കേരളത്തിനുവേണ്ടിയാണ് സംസാരിക്കുന്നത്. തൃശൂർകാരാണ് എന്നെ എംപിയായി തിരഞ്ഞെടുത്തത്. അതിനുമുൻപേ ഞാൻ പറഞ്ഞിരുന്നു. തൃശൂരിനുവേണ്ടി മാത്രമല്ല ഞാൻ പ്രവർത്തിക്കുന്നത്, കേരളത്തിനുവേണ്ടിയായിട്ടായിരിക്കും ഞാൻ പ്രവർത്തിക്കുകയെന്ന്'- സുരേഷ് ഗോപി പറഞ്ഞു.