അ​ദ്വൈ​താ​ശ്ര​മ​ത്തി​നെ​തി​രെ​ ​ന​ട​പ​ടി​യി​ല്ല: പ​ര​സ്യ​ ​ബോ​ർ​ഡ് സ്ഥാ​പി​ച്ച​ത് സാം​സ്കാ​രി​ക​ ​വ​കു​പ്പെന്ന് ​ന​ഗ​ര​സഭ

ആലുവ: നിയമവിരുദ്ധമായി പരസ്യ ബോർഡ് സ്ഥാപിച്ചെന്നാരോപിച്ച് അദ്വൈതാശ്രമത്തിന് പിഴ നോട്ടീസ് നൽകിയത് വിവാദമായതിനെ തുടർന്ന് മലക്കം മറിഞ്ഞ് നഗരസഭ അധികൃതർ. അദ്വൈതാശ്രമമല്ല,​ സാംസ്കാരിക വകുപ്പാണ് ബോർഡ് സ്ഥാപിച്ചതെന്നാണ് പുതിയ കണ്ടെത്തൽ. തുടർന്ന് ആശ്രമത്തിനെതിരായ നടപടി അവസാനിപ്പിച്ചെന്നും അറിയിച്ചു

ഇന്നലെയാണ് പരസ്യ ബോർഡ് സ്ഥാപിച്ചത് സാംസ്കാരിക വകുപ്പാണെന്ന കണ്ടുപിടുത്തവുമായി പത്രക്കുറിപ്പ് ഇറക്കിയത്. ഒക്ടോബർ 31ന് അദ്വൈതാശ്രമത്തിൽ നടന്ന മാനവമൈത്രി സംഗമത്തിന്റെ പ്രചാരണത്തിന് പുളിഞ്ചോട് സിഗ്നലിന് സമീപം ബോർഡ് സ്ഥാപിച്ചിരുന്നതിനെതിരെ നഗരസഭയ്ക്ക് പരാതി ലഭിച്ചിരുന്നു. തുടർന്നാണ് ബോർഡ് നീക്കുകയും ആശ്രമത്തിന് പിഴ ചുമത്തി നോട്ടീസും നൽകിയത്.

എന്നാൽ മാനവ മൈത്രി സംഗമം സംഘടിപ്പിച്ചത് സംസ്ഥാന സാംസ്‌കാരിക വകുപ്പ് ആണെന്നും സംഗമത്തിന് വേദി നൽകുക മാത്രമാണ് അദ്വൈതാശ്രമം ചെയ്തിട്ടുള്ളതെന്നും പരസ്യ ബോർഡുമായി ആശ്രമത്തിന് ബന്ധമില്ലെന്നും ബോദ്ധ്യപ്പെട്ടതിന്റെ അടിസ്ഥാനത്തിൽ നഗരസഭ സ്വീകരിച്ച നടപടികൾ ഒഴിവാക്കാൻ തീരുമാനിച്ചതായി ചെയർമാൻ എം.ഒ. ജോൺ അറിയിച്ചു.

അതേസമയം, സാംസ്കാരിക വകുപ്പിന്റെ ആഭിമുഖ്യത്തിൽ എന്ന് വളരെ വ്യക്തമായി പ്രചരണ ബോർഡിൽ ഉണ്ടായിരുന്നിട്ടും അദ്വൈതാശ്രമത്തിന് പിഴ നോട്ടീസുമായി ഉദ്യോഗസ്ഥരെത്തിയതിന്റെ കാരണമാണ് വ്യക്തമല്ലാത്തത്. അക്ഷരങ്ങൾ കൂട്ടിവായിക്കാനറിയാത്ത നഗരസഭയാണോ ആലുവയുടേതെന്ന് നാട്ടുകാർ ചോദിക്കുന്നു.