'കിഴക്കമ്പലം മോഡൽ" ഉയ‌ർത്തി കൊച്ചി പിടിച്ചെടുക്കാൻ ട്വന്റി 20

കൊച്ചി: 'കേരള മോഡൽ ഉയർത്തി" തദ്ദേശ സ്ഥാപനങ്ങളാകെ പിടിക്കാൻ എൽ.ഡി.എഫ് കളം നിറയുമ്പോൾ, ഇടതുമുന്നണിയിൽ നിന്ന് കൊച്ചി കോർപ്പറേഷൻ പിടിച്ചെടുക്കാൻ ട്വന്റി 20 ഉയർത്തിക്കാട്ടുന്നത് കിഴക്കമ്പലം മോഡൽ. കോർപ്പറേഷനിലെ 76 ഡിവിഷനുകളിൽ 56 എണ്ണത്തിലാണ് ട്വന്റി 20 മത്സരിക്കുന്നത്. 20 ഇടത്ത് പോരാട്ടത്തിനില്ലെങ്കിലും ഭരണം പിടിക്കുമെന്ന ആത്മവിശ്വാസത്തിലാണ് പാർട്ടി. എറണാകുളം പ്രസ് ക്ലബിൽ ഇന്നലെ കൊച്ചി കോർപ്പറേഷനിലേക്കുള്ള പ്രകടന പത്രിക ട്വന്റി 20 പുറത്തിറക്കി.

കൊച്ചിയെ ലോക നിലവാരത്തിലേക്ക് ഉയർത്തും, നഗരത്തെ മാലിന്യമുക്തമാക്കും, കുടിവെള്ള ക്ഷാമം പരിഹരിക്കും, ഗതാഗതക്കുരുക്കിന് പരിഹാരം കണ്ടെത്തും, വെള്ളക്കെട്ട് ഇല്ലാതാക്കും തുടങ്ങി ആറ് വാഗ്ദാനങ്ങൾ മാത്രം ഉയർത്തിയാണ് പ്രകടന പത്രിക. സ്ഥാനാർത്ഥികളുടെ പട്ടികയും പുറത്തുവിട്ടു. പാർട്ടി ഭരിക്കുന്ന നാല് പഞ്ചായത്തുകളിലെയും ഒരു ബ്ലോക്ക് പഞ്ചായത്തിലെയും വികസനം ഉയർത്തിക്കാട്ടിയാണ് കൊച്ചിയിൽ സ്ഥാനാർത്ഥികൾ ജനവിധി തേടുന്നതെന്ന് പ്രകടന പത്രിക പുറത്തിറക്കി പാർട്ടി സംസ്ഥാന വൈസ് പ്രസിഡന്റ് വി. ഗോപകുമാർ പറഞ്ഞു.

ഇടത് - വലത് മുന്നണികൾ കോർപ്പറേഷൻ മാറിമാറി ഭരിച്ച് കൊച്ചിയെ പിന്നോട്ടടിച്ചു. കാനപോലും കൃത്യമായി വൃത്തിയാക്കാറില്ല. ഒറ്റമഴയിൽ വെള്ളക്കെട്ടാണ്. പിന്നെ കൊതുക് ശല്യം രൂക്ഷവും. തങ്ങൾക്ക് പ്രകടന പത്രികയായി വലിയ ബുക്കുകളൊന്നുമില്ല. പ്രഖ്യാപിച്ച വാഗ്ദാനങ്ങൾ നടപ്പാക്കുമെന്നും വി. ഗോപകുമാർ വ്യക്തമാക്കി. തിരഞ്ഞെടുപ്പ് വിജ്ഞാപനം നിലനിൽക്കെ ഹൈബി ഈഡൻ എം.പിയുടെ പല പ്രഖ്യാപനങ്ങളും ചട്ടലംഘനമാണ്. ഇതിനെതിരെ കോടതിയെ സമീപിക്കും.

ട്വന്റി20 സ്ഥാനാർത്ഥിയെ പിന്തിരിപ്പിക്കാനുള്ള പ്രതിപക്ഷ നേതാവ് വി.ഡി. സതീശന്റെ ശ്രമം പരിതാപകരമാണ്. ഇതിനെതിരെ പരാതിപ്പെടാനാകും. പക്ഷേ നിയമപരമായി മുന്നോട്ടുപോകുന്നില്ല.

അതേസമയം പാർട്ടി ഭരിക്കുന്ന പഞ്ചായത്തുകളിൽ പദ്ധതികൾ നടപ്പിലാക്കാൻ കോടതിയെ സമീപിക്കേണ്ട അവസ്ഥയാണെന്നും പല പദ്ധതികളും മുടക്കിയെന്നും കേന്ദ്ര - സംസ്ഥാന സർക്കാർ അനുവദിക്കുന്ന ഫണ്ട് വകമാറ്റുന്നുവെന്ന ആരോപണം ശരിയല്ലെന്നും ട്വന്റ20 ഭാരവാഹികൾ പറഞ്ഞു.