അങ്കണവാടി ജീവനക്കാരിയെ അസഭ്യം പറഞ്ഞു: എൽ.ഡി.എഫ് സ്ഥാനാർത്ഥിക്കെതിരെ കേസ്

തൊടുപുഴ: വണ്ണപ്പുറത്ത് എൽ.ഡി.എഫ് സ്ഥാനാർത്ഥി അങ്കണവാടി ജീവനക്കാരിയെ അസഭ്യം പറഞ്ഞതായ പരാതിയിൽ പൊലീസ് കേസെടുത്തു. പതിമൂന്നാം വാർഡ് മുള്ളങ്കുത്തിയിലെ സ്ഥാനാർത്ഥിയും സി.പി.എം ബ്രാഞ്ച് സെക്രട്ടറിയുമായ ലിജോ ജോസഫിനെതിരെയാണ് കാളിയാർ പൊലീസ് കേസെടുത്തത്. അങ്കണവാടിയിലെത്തി ചീത്ത വിളിക്കുകയും അശ്ലീല പദപ്രയോഗങ്ങൾ നടത്തുകയും ചെയ്‌തെന്ന വകുപ്പുകൾ പ്രകാരമാണ് കേസ്. വെള്ളിയാഴ്ചയായിരുന്നു സംഭവം. വോട്ട് അഭ്യർത്ഥിച്ച് എത്തിയ സ്ഥാനാർത്ഥി, അസഭ്യം പറയുകയും ചെയ്തതായാണ് പരാതി. കാളിയാർ കൈനിക്കൽ നബീസയാണ് പരാതിക്കാരി. നബീസയ്ക്ക് വോട്ടുള്ള വാർഡിലെ സ്ഥാനാർത്ഥിയാണ് ഷിജോ. നിലവിൽ തൊടുപുഴ പെരുമ്പിള്ളിച്ചിറയിൽ താമസിക്കുന്ന നബീസയുടെ വോട്ട് പട്ടികയിൽ നിന്നും നീക്കം ചെയ്യുന്നത് സംബന്ധിച്ച് ലിജോയ്‌ക്കെതിരെ ആക്ഷേപമുണ്ടായിരുന്നു. സ്ഥലം വിറ്റെങ്കിലും ആധാരം നടത്തുന്നത് ഉൾപ്പെടെയുള്ള നടപടികൾ പൂർത്തീകരിച്ചില്ലെന്നാണ് നബീസ പറയുന്നത്. ഉച്ച സമയത്ത് അംഗൻവാടിയിലെത്തിയപ്പോഴാണ് കുട്ടികൾ കേൾക്കെ ലിജോ മോശമായ പ്രയോഗങ്ങൾ നടത്തിയതെന്നും നബീസ പറഞ്ഞു. സംഭവം സോഷ്യൽ മീഡിയയിൽ അടക്കം വ്യാപകമായി പ്രചരിച്ചിരുന്നു. എന്നാൽ നബീസയുടെ വാക്കുകൾ ലിജോയെ പ്രകോപിച്ചതിനാൽ പ്രതികരിച്ചെങ്കിലും അസഭ്യം പറഞ്ഞുവെന്നത് വാസ്തവ വിരുദ്ധമാണെന്നാണ് പാർട്ടി നേതൃത്വം നൽകുന്ന വിശദീകരണം.