ഗുരുദർശനം ഇളം മനസുകളിൽ പകർന്നു നൽകണം: സ്വാമി സച്ചിദാനന്ദ

ശിവഗിരി: ശ്രീനാരായണഗുരുദേവന്റെ തത്വദർശനവും ജീവിതചരിത്രവും ഇളം മനസുകളിൽ പകർന്നു നൽകുന്നതിൽ വ്യക്തിയും സമൂഹവും കൂടുതൽ ശ്രദ്ധിക്കണമെന്ന് ശ്രീനാരായണ ധർമ്മസംഘം ട്രസ്റ്റ് പ്രസിഡന്റ് സ്വാമി സച്ചിദാനന്ദ. 93-ാമത് തീർത്ഥാടനത്തോടനുബന്ധിച്ച് ശിവഗിരിയിൽ നടന്ന ശ്രീനാരായണ കലാസാഹിത്യ മത്സര സമ്മേളനം ഉദ്ഘാടനം ചെയ്തു സംസാരിക്കുകയായിരുന്നു സ്വാമി. പുതിയ തലമുറ മദ്യപാനത്തിനും മയക്കുമരുന്നിനും അടിമപ്പെടുന്നതും ആത്മഹത്യാ പ്രവണത വർദ്ധിച്ചു വരുന്നതിനും കാരണം മഹാഗുരുക്കന്മാരുടെ ഉപദേശങ്ങൾ അറിയാതെ പോകുന്നതിനാലാണ്. മദ്യം വിഷമാണ്,അതുണ്ടാക്കരുത്,കൊടുക്കരുത്,കുടിക്കരുത് എന്ന സന്ദേശം ബാലമനസുകളിൽ പതിയണം. അതുപോലെ ഗുരുദേവ സന്ദേശവും കുട്ടികൾക്ക് പകർന്നു നൽകണം. ശ്രീനാരായണ ഗുരുവിനെ സാധാരണ സാമൂഹ്യ പരിഷ്കർത്താക്കളുടെ കൂട്ടത്തിൽപ്പെടുത്തുന്നതിനുമപ്പുറം ഗുരുദേവനെ ശ്രീബുദ്ധൻ,ക്രിസ്തു,നബി തുടങ്ങിയ പരമ്പരയിലുള്ള വിശ്വഗുരുവാണ്. ജാതിക്കോ മതത്തിനോ വർഗ്ഗത്തിനോ ദേശത്തിനോ അവകാശപ്പെട്ട വ്യക്തിയല്ലെന്നും ഗുരുദേവനെ ഗുരുവായി കാണണമെന്നും പഠിപ്പിക്കണമെന്നും സ്വാമി പറഞ്ഞു. ശ്രീനാരായണ ധർമ്മസംഘം ട്രസ്റ്റ് ട്രഷററും ശിവഗിരി തീർത്ഥാടന കമ്മിറ്റി സെക്രട്ടറിയുമായ സ്വാമി ശാരദാനന്ദ അദ്ധ്യക്ഷത വഹിച്ചു. ധർമ്മസംഘം ട്രസ്റ്റ് ജനറൽ സെക്രട്ടറി സ്വാമി ശുഭാംഗാനന്ദ,സ്വാമി അവ്യയാനന്ദ എന്നിവർ അനുഗ്രഹ പ്രഭാഷണം നടത്തി. കലാസാഹിത്യ കമ്മിറ്റി ചെയർമാൻ ഡോ.അജയൻപനയറ,വർക്കിംഗ് ചെയർമാൻമാരായ പുത്തൂർശോഭനൻ,ഷോണി ജി. ചിറവിള,ബാബുജി ഇലകമൺ,ജി. മനോഹരൻ വർക്കല,ശ്യാമള ടീച്ചർ എന്നിവർ സംസാരിച്ചു.