സൗദിയിലെത്തി രണ്ടാം ദിവസം യുവതിക്കും മകനും ദാരുണാന്ത്യം, ഭർത്താവും ഇളയ മകനും ആശുപത്രിയിൽ

വേങ്ങര: സൗദിയിലെ ഖുൻഫുദയിലുണ്ടായ വാഹനാപകടത്തിൽ മലപ്പുറം വേങ്ങര സ്വദേശിയായ യുവതിയും മകനും മരിച്ചു. ഖുൻഫുദയിൽ ജോലി ചെയ്യുന്ന വേങ്ങര കോട്ടുമല സ്വദേശി പാറ്റൊടുവിൽ ഇസ്ഹാഖിന്റെ ഭാര്യ ഷഹറാബാനു (30), മൂത്ത മകൻ മുഹമ്മദ് ഷാൻ (11) എന്നിവരാണ് മരിച്ചത്. ഇന്നലെ ഉച്ചയ്ക്ക് 12.30ഓടെ അൽഖൗസിൽ നിന്ന് ഹാലിയിലേക്ക് ഇസ്ഹാഖിന്റെ സഹോദരനെ കാണാൻ പോകുന്നതിനിടെയാണ് അപകടമുണ്ടായത്.

വാഹനമോടിക്കുന്നതിനിടയിൽ മുൻ സീറ്റിലുണ്ടായിരുന്ന കുട്ടിക്ക് സീറ്റ് ബെൽറ്റിടാൻ ഡ്രൈവ് ചെയ്തിരുന്ന ഇസ്ഹാഖ് സഹായിക്കുന്നതിനിടെ മുമ്പിലുണ്ടായിരുന്ന ട്രെയിലർ വാഹനത്തിലിടിച്ചാണ് അപകടമുണ്ടായത്. രണ്ട് ദിവസം മുമ്പാണ് സന്ദർശക വിസയിൽ ഇസ്ഹാഖിന്റെ കുടുംബം സൗദിയിലെത്തിയത്. മൃതദേഹങ്ങൾ ഖുൻഫുദ ജനറൽ ആശുപത്രിയിൽ സൂക്ഷിച്ചിരിക്കുകയാണ്. അപകടത്തിൽ പരിക്കേറ്റ ഇസ്ഹാഖും ഇളയ കുട്ടിയും ഇതേ ആശുപത്രയിൽ ചികിത്സയിലാണ്.